ԱՄԵՆԱՅՆ ՀԱՅՈՑ ՀԱՅՐԱՊԵՏԻ ՏՆՕՐԻՆՈՒԹՅԱՄԲ ՆՈՐ ՆՇԱՆԱԿՈՒՄՆԵՐ

9

Մայր Աթոռի տեղեկատվական համակարգից տեղեկանում ենք, որ հունվար 21-ին Ամենայն հայոց հայրապետի տնօրինությամբ Արցախի թեմի առաջնորդ Պարգեւ արք. Մարտիրոսյանը նշանակվել է հատուկ հանձնարարությունների գծով հայրապետական նվիրակ, առաջնորդի պաշտոնը զիջելով, դարձյալ հայրապետական տնօրինմամբ, Վրթանես եպս. Աբրահամյանին, որ մինչ այդ ՀՀ զինված ուժերի հոգեւոր առաջնորդն էր: Վերջինի փոխարեն նույն պաշտոնն ստանձնել է Ենովք քահանա Եսայանը:

Կարծում ենքՙ կարեւոր նշանակումներ են բոլորը, հատկապեսՙ ամենքի կողմից հարգված, արցախահայության անմնացորդ սերը վայելող եկեղեցականի հայրապետական պատվիրակ նշանակումը: Այդ հանգամանքով Սրբազանը կարող է տարբեր մայրաքաղաքներում ներկայացնել ոչ միայն Մայր աթոռը, այլեւՙ արցախահայությանը, նրա հրատապ խնդիրները: