Հ.Ա., Պրահա
Հայաստանի եւ Արցախի համար այս օրհասական օրերին մեր հայրենակիցները օգնության տարբեր ճանապարհներ են փնտրում, եւ դրանցից մեկը Պրահայի հայ վարսահարդարների նախաձեռնությունն էր:
Անցած մի քանի շաբաթվա ընթացքում չեխահայեր Սոնա Վարդանյանը, Դավիթ Ներսիսյանը, Մարինե Տեր-Ղազարյանը եւ Իրինա Բարսեղովան իրականացրեցին մի հետաքրքրական ակցիա, որպեսզի հավելյալ գումար հավաքեն եւ ուղարկեն Հայաստան: Վարսահարդար Սոնա Վարդանյանի «Սոնատա» գեղեցկության սրահում միայն շաբաթ եւ կիրակի օրերին անվճար սպասարկեցին հայրուրավոր հաճախորդների, իսկ նրանց կողմից ըստ ցանկության թողնված գումարը հավաքեցին եւ ուղարկեցին Հայաստան:
«Առաջին շաբաթվա գումարը, որ մոտ 5300 եվրո էր, ուղարկեցինք «Հայ մայրեր» բարեգործական ընկերությանը, որը զբաղվում էր Արցախից Հայաստան տեղափոխված 400 մայրերի ու երեխաների համար անհրաժեշտ պարագաների ապահովմամբ: Հաջորդ շաբաթվա երկու օրերին հավաքված 4000 եվրոն ուղարկվել է Հայաստանՙ հայ կամավորների համար քնապարկեր եւ տաք հագուստ գնելու նպատակով: Իսկ վերջինՙ հոկտեմբերի 10-11ի հավաքած 2500 եվրո գումարը ուղարկել են Զինվորների ապահովագրության հիմնադրամին, որպեսզի նաեւ մեր վիրավոր կամ զոհված զինվորների ընտանիքներին նույնպես օգնություն հասնի»,- պատմում է գեղեցկության սրահի տնօրեն Սոնա Վարդանյանը :
Եվս 500 եվրո ուղարկել են բարեգործական ընկերությանըՙ այլ հագուստներ գնելու համար: Նրա ասելով , այս նախաձեռնության հիմնական նպատակներից մեկն էլ այն էր, որպեսզի օտարները նույնպես մասնակցեն Արցախի համար հանգանակությանը: «Պատկերացրեք, հաճախորդների 70 տոկոսը չեխեր էին կամ այլազգիներ»,- ասում է Սոնան: Սակայն այսքանով նրանց օգնությունը չի ավարտվում: Մտածում են այլ նախագծեր էլ իրականացնել, որպեսզի ավելի մեծանա մասնակիցների շրջանակը:
Հիշեցնենք, որ Չեխիայի հայ համայնքից կազմակերպված եւ առանձին անհատների միջոցով 60 հազար դոլարից ավելի գումար է փոխանցվել «Հայաստան» համահայկական հիմնադրամին: Դրամահավաքը շարունակվում է:
