Ապրիլի 13-ին, ժամը 11:00-ին կգումարվի Ազգային ժողովի արտահերթ նիստ` կառավարության սահմանած օրակարգով, որտեղ երեք նախագիծ է ընդգրկված:
Դրանցից «Դեղերի մասին» ՀՀ օրենքում փոփոխություն եւ լրացումներ կատարելու մասին» նախագծով դեղերի մեծածախ իրացման լիցենզավորման ժամկետը երկարաձգվում է եւս չորս ամսով` հաշվի առնելով կորոնավիրուսային հիվանդության (COVID-19) հետեւանքով տնտեսվարող սուբյեկտների համար առաջացած դեղերի մեծածախ իրացման լիցենզավորման գործընթացի կազմակերպման գործնական անհնարինությունը:
«Բնակչության բժշկական օգնության եւ սպասարկման մասին» ՀՀ օրենքում լրացում կատարելու մասին», ինչպես նաեւ «Լիցենզավորման մասին» ՀՀ օրենքում լրացում կատարելու մասին» ՀՀ օրենքներում լրացում կատարելու մասին նախագծերով առաջարկվում է կորոնավիրուսային հիվանդության (COVID-19) համար բժշկական օգնության եւ սպասարկման ծառայությունների մատուցման նպատակով իրենց լիցենզիայով չնախատեսված բժշկական օգնություն եւ սպասարկում իրականացնող բժշկական կազմակերպությունների կարողությունների օգտագործում, ինչպես նաեւ կորոնավիրուսային հիվանդությամբ ախտահարված անձանց բժշկական օգնության եւ սպասարկման ծառայությունների մատուցմանը այլ բուժաշխատողներ, այդ թվում կլինիկական օրդինատուրայի ավարտական կուրսերի ուսանողների ներգրավում:
Սաՙ երկուշաբթի կայանալիք արտահերթ նիստում, իսկ արդեն երեքշաբթի կսկսվի ԱԺ հերթական նիստ, որտեղ պետք է անդրադարձ կատարվի արտակարգ դրության ռեժիմը երկարաձգել- չերկարաձգելուն:
