Արեւիկ Քեշիշյան
Աֆրոամերիկացիներն ու իտալացիները առավել ընկալունակ են
Նոր տիպի կորոնավիրուսի ծանրության աստիճանների տարբերությունը, ինչպես նաեւ աշխարհում դրա տարածման արագությունը կարող են կապված լինել որեւէ առանձին երկրի գենոֆոնդի առանձնահատկությունների հետ։ Այսպես, գիտնականները ենթադրում են, որ COVID-19-ը Իտալիայի բնակիչների բջիջների հետ փոխազդեցության մեջ է մտնում ոչ այնպես, ինչպես ասիացիների եւ այլ ազգերի ներկայացուցիչների հետ։ Բացի դրանից, ամերիկացի բժիշկները նշում են, որ կորոնավիրուսը աֆրոամերիկացիների վրա ավելի ուժեղ է ազդում, քան մյուսների վրա։
Այս տեղեկությունները պարունակող հոդվածը կարելի է գտնել medRxiv էլեկտրոնային գրադարանում։ Հետազոտողները, որոնց պնդումները առայժմ ստուգված չեն անկախ փորձագետների կողմից, երեք փոփոխակ են հայտնաբերել ACE2 գենի մեջ, որը բավական հաճախ է հանդիպում իտալացիների, եվրոպական այլ ազգերի շրջանում եւ գրեթե բացակայում է ասիական ժողովուրդների մեջ։
Կորոնավիրուսային վարակի տարածման գենետիկական առանձնահատկությունները մասամբ բացատրվում են ԱՄՆ-ում հիվանդացությանը վերաբերող տվյալներով։ ԱՄՆ-ի գլխավոր վիրաբույժ Ջերոմ Ադամսը ուշադրություն է դարձրել COVID-19-ի անհամամամասնական ազդեցության վրա։ Նրա խոսքերով, վարակից առավել շատ տուժել են աֆրոամերիկյան հանրակցության ներկայացուցիչները։
Washington Post թերթի ներկայացրած տվյալների վերլուծության մեջ ասվում է, որ այն շրջաններում, որտեղ բնակչության մեծամասնությունը կազմում են աֆրոամերիկացիները, վարակման դեպքերն արձանագրվում են երեք անգամ ավելի հաճախ, իսկ մահացության մակարդակը գրեթե վեց անգամ ավելի բարձր է, քան առավելապես սպիտակամորթներով բնակեցված շրջաններում։ Մասնավորապես, Լուիզիանա նահանգում կորոնավիրուսից մահացածների 70 տոկոսը կազմում են աֆրոամերիկացիները, որոնք բնակչության մոտ 32 տոկոսն են։ Միլուոկի նահանգում աֆրոամերիկացիները կազմում են բնակչության 26 տոկոսը, բայց վարակվածների 50 տոկոսը եւ մահացածների 81 տոկոսը սեւամորթներ են։ Չիկագոյում աֆրոամերիկացիները կազմում են բնակչության 30% տոկոսը, իսկ մահացածների մեջ նրանք 68% են։
