Գեղամ Քյուրումյան
ԿԱՄՙ ԱՋ ՁԵՌՔՈՎ ՁԱԽ ԱԿԱՆՋԸ
Վերնագրում դրված ակնարկը վերաբերում է միլիոններով աշխատավարձ ստացող ՀՀ նախարարներից մեկի օրերս կայացած ասուլիսում հնչեցրած մի… մտքի: Այս օրերին արձանագրվող գնաճի վերաբերյալ հարցին այսպիսի մի պատասխան տրվեց. հիմա մեզանում լոգիստիկ շղթաներն են վնասվում:
Պետհամալսարանի բանասիրության ֆակուլտետն ավարտած ընկերներիս, որոնց թվում գիտությունների թեկնածուներ ու անգամ դոկտոր կա, դիմեցի ասվածը մեկնաբանելու խնդրով: Ավաղ, արդյունքի չհասա, քանզի խոսքերը նախարարական էին, որոնք հասկանալու եւ ըմբռնելու համար հարկ էր առնվազն փոխնախարար լինել:
Նման մեկի օգնականն էլ հենց բացատրեց. նախարարի խոսքը պարզ հայերենով վերաբերում էր պարեն ներկրողների մոտ ծագող տրանսպորտային խնդիրներին, որոնք էլ գնաճի են հանգեցնում: Ակամա հիշեցի աջ ձեռքով ձախ ականջը բռնելու զրույցը: Կենսունակ մոտեցում է, ոչինչ անել չես կարող:
