Փետրվարի 18-ին լուրեր տարածվեցին, թե Լիբիայի ազգային բանակի հրամանատար Խալիֆե Խաֆթարի ուժերը հարձակում են գործել Տրիպոլիի նավահանգստի վրա, հրթիռակոծելով մի բեռնանավ: Այնուհետեւ պարզվեց, որ եղել է երկու հարձակում, որի հետեւանքով երեք խաղաղ բնակիչ մահացել է, հինգըՙ վիրավորվել: Լիբիայի առողջապահության նախարարությունը հաստատել է տուժածների առկայության փաստը:Այդ ընթացքում գեներալ Խաֆթարի բանակի մամուլի ծառայությունը, ինչպես Euronews-ն ու Sputnik-ն են նշում, հստակեցրել տեղեկությունը, նշելով, որ հրթիռակոծված նավը թուրքական էր, Թուրքիայից Լիբիա զենք եւ զինամթերք էր կրում եւ ոչնչացվել է հրթիռակոծության հետեւանքով: Թուրքական նավի հրթիռակոծությունից հետո, ըստ Reuters-ի, Տրիպոլիի ազգային համաձայնության կառավարությունը դադարեցրել է հրադադարի բանակցությունները:
Թուրքական մամուլը, հատկապես իշխանամետ, մեծ վերապահությամբ արձագանքեց թուրքական նավի հրթիռակոծման լուրին, մատնանշելով, թե հրթիռակոծության պահին Տրիպոլիի նավահանգստում թուրքական որեւէ նավ չի եղել: Մինչդեռ, թուրքական նավը, Sputnik-ի վկայությամբ, խարիսխ էր գցել այնտեղ: Ավելինՙ այս փաստը հաստատեց Թուրքիայի նախագահի խորհրդական Իբրահիմ Քալընը : Նա ասաց, որ հիրավի թուրքական նավը ենթարկվել է հարձակման, նույնիսկ այս հարցը քննարկվել է նախարարների խորհրդի նիստում, բայց արձակված հրթիռները շեղվել են նշանակետից, չնայած դրանՙ թուրքական ուժերն անմիջապես պատասխան գործողությունների են դիմել:
