Ստամբուլից «Բիանետ» գործակալությունը հաղորդում է, որ հայազգի Սեւակ Բալըքջիի գործով ամբաստանյալ Կիվանչ Ագաօղլուն 16 տարի 8 ամսվա բանտարկության է դատապարտվել:
Բալըքջին, հիշեցնենք, սպանվել էր 2011 թվի ապրիլի 24-ին, իր զինվորական ծառայությունը Բաթման նահանգի Կոզլուք շրջանում ավարտելուց ընդամենը 20 օր առաջ: Մեղադրող կողմը պարզել էր, որ օգտագործված զենքը թերություններ չէր ունեցել, եւ չէր կարող ինքնաբերաբար կրակել: Դիյարբեքիրի օդուժի զինվորական 2-րդ դատարանը 2013-ին «գիտակցված սպանության» մեղադրանքով ամբաստանյալին 4 տարի, 5 ամիս եւ 10 օրվա բանտարկության էր դատապարտել: Բալըքջիի հարազատները վճռաբեկ դատարան էին դիմել, որը բեկանել էր որոշումը, սակայն մինչեւ վերջնական դատավճիռ արձակելը 2016-ի հուլիսյան դեպքերի (կառավարությունը տապալելու փորձ) կապակցությամբ դատարանը ցրվել էր: Հետագայում Կոզլուքի առաջին ատյանի քրեական դատարանում վերանայվել էր Սեւակի ընտանիքի բողոքը եւ միայն այս տարվա հունվարի երկրորդ կեսին արձակվել 16 տարվա բանտարկության դատավճիռը:
Ժողովրդա-դեմոկրատական (HDP) կուսակցությունից խորհրդարանի պատգամավոր Կարո Փայլանը «Բիանետի» հետ զրուցելիս հատուկ ուշադրություն է դարձրել այն փաստին, որ սպանությունը տեղի էր ունեցել ապրիլի 24-ին: «Թուրքիային անհրաժեշտ է ստեղծել հանդուրժողականության առողջ մթնոլորտ, որտեղ ատելությունը եւ դրա հիման վրա կատարված սպանությունները տեղ չունենան: Մենք դեռ չենք հասել դրան եւ պետք է շարունակենք քաղաքական պայքարը մինչեւ կարողանանք ստեղծել այդպիսի մթնոլորտ», ասել է նա:
Նկար 1. Հայազգի Սեւակ Բալըքջի
