Այս շաբաթ խորհրդարանը քննարկում էր Հայաստանի 2020 թվականի պետական բյուջեի նախագիծը, որն այսօր դեռ կշարունակվի քննարկվել: Եկող տարվա համար կանխատեսվում է ունենալ 4.9 տոկոս տնտեսական աճ, սակայն ակնկալիքներ կան մինչեւ 7 տոկոս աճի գեներացման: Գնաճը կլինի 2 տոկոսի սահմաններում: Հարկեր-ՀՆԱ հարաբերակցությունը 22,6 տոկոս է կանխատեսված: Ակնկալվում է ունենալ արտահանման 10.9 տոկոս առաջանցիկ աճ: Արդյունաբերության աճը 5 տոկոս է սպասվում, գյուղատնտեսությանըՙ 0,5 տոկոս: Արդեն ելույթներ են ունեցել առանցքային պաշտոնյաները, ԿԲ նախագահը, ԱԺ հանձնաժողովների ներկայացուցիչները:
«Անարդյունավետ ծախսերի ժամանակն անցել է, սկսվել է ռազմավարություն կառուցելու ժամանակը», նշել էՙ հարակից զեկուցող, ֆինանսավարկային եւ բյուջետային հանձնաժողովի նախագահ իմքայլական Արտակ Մանուկյանը` նոր բյուջեի թվերը վերլուծելով եւ այն անվանելով ապագա զարգագմանն ուղղված: Բյուջեի նախագծի վերաբերյալ ինտրիգը պահպանվում է, քանի որ դեռ պարզ չէ, թե ինչ դիրքորոշում կորդեգրեն ԲՀԿ- ն եւ «Լուսավոր Հայաստանը»: ԲՀԿ- ն առիթներ ունեցել է ասելու, թե այս բյուջեն հեղափոխական չէ եւ զարգացում չի ապահովի:
