Բոլոր անօրինական օտարերկրյա զորամիավորումները պետք է հեռանան Սիրիայի տարածքից, հակառակ դեպքում Սիրիայի Արաբական Հանրապետության կառավարությունն իրեն իրավունք է վերապահում դիմելու ամեն տեսակ պատասխան գործողությունների: Այդ մասին սեպտեմբերի 28-ին հայտարարել է Սիրիայի արտգործնախարար Վալիդ Մուալլեմը :
Նյու Յորքում ՄԱԿ-ի Ընդհանուր ժողովի 74-րդ նստաշրջանում իր ելույթի ընթացքում Մուալլեմը նշել է, որ երկրի տարածքում շարունակում են ապօրինաբար գտնվել թուրքական եւ ամերիկյան զորքեր: Ի խախտումն ՄԱԿ-ի նորմերի եւ խարտիայի, այդ պետությունները «հասել են այնպիսի լկտիության, որ նույնիսկ բանակցություններ են վարում Սիրիայի հյուսիսում այսպես կոչված անվտանգության գոտու ստեղծման շուրջ»:
Վալիդ Մուալլեմը նաեւ նախազգուշացրել է, որ եթե ԱՄՆ-ը եւ Թուրքիան դուրս չբերեն զինված ուժերը, ապա Սիրիան իրեն իրավունք կվերապահի ձեռնարկելու ամեն տեսակ հակամիջոցներՙ միջազգային նորմերին համապատասխան, հաղորդում է Ռեգնում գործակալությունը:
Հիշեցնենք, որ Սիրիայում քաղաքացիական պատերազմը օտար պետությունների միջամտությամբ շարունակվում է 2011 թվականից: «Իսլամական պետություն» ահաբեկչական միավորման նկատմամբ հաղթանակի մասին հայտարարվեց 2017 թվականի վերջերին: Ներկայումս Սիրիայի կառավարությունը ահաբեկիչներից մաքրում է երկրի առանձին շրջաններ: Երկրի իշխանությունները քանիցս ՄԱԿ-ին են դիմել, որպեսզի պատասխանատվության ենթարկվեն միջազգային կոալիցիայի ուժերը Վաշինգտոնի գլխավորությամբ:
