Որոտանի հիդրոէլեկտրակայանների համակարգը բաղկացած է երեք հիդրոէլեկտրակայաններից, որոնք տեղաբաշխված են Որոտան գետի վրա: Հիդրոէլեկտրակայանների համակարգը կազմված է երեք աստիճանից: Գումարային տեղակայված էլեկտրական հզորությունը կազմում է 404.2 ՄՎտ, տարեկան միջին նախագծային արտադրանքըՙ 1.16 միլիարդ կՎտժ:
1970 թ. դեկտեմբերին գործարկվել է համակարգի առաջնեկըՙ Տաթեւ ՀԷԿ-ը, 1978թ-ինՙ Շամբը, իսկ 1989 թ-ինՙ Սպանդարյան ՀԷԿ-երը:
Սպանդարյանի հիդրոհանգույցը համակարգի գլխամասային աստիճանն է: Հանգույցի մեջ մտնում է տեղական նյութերով եւ կավահողային միջուկով 83 մետր բարձրության պատվարը, որի կատարի երկարությունը 315 մ է: Ջրամբարի ընդհանուր տարողությունը 257 միլիոն խորանարդ մետր է, օգտակարըՙ 218 միլիոն խորանարդ մետր: Հիդրոհանգույցն ունի չորս ջրընդունիչ կառույց, առաջինը` ճնշման թունել, երկրորդըՙ խորքային ջրթափ, երրորդըՙ Որոտան-Արփա թունելՙ ջուրը Սեւանա լիճ հասցնելու համար: Չորրորդը ջրթափ կառույցն էՙ 103 մ3/վրկ թողունակությամբ, մակերեւույթային արագահոսք տիպի :
Ճնշման թեքումային թունելն ունի մոտ 4 կիլոմետր երկարություն, 30մ3/վրկ թողունակություն: Միաճյուղ տուրբինային խողովակաշարը ճյուղավորվում է երկու մասի եւ յուրաքանչյուրը 15 մ3/վրկ թողունակությամբ միանում է կայանի երկու ագրեգատներին:
Կայանի հզորությունը կազմում է 76 ՄՎտ, 210 միլիոն կՎտժ էլեկտրաէներգիայի տարեկան նախագծային արտադրանքով: Հաշվարկային ճնշումը կայանում 295 մետր է:
Ներկայումս ՀԷԿ-ը մեծ դեր է կատարում ՀՀ էներգահամակարգում օրական բեռի գրաֆիկի ծածկման համար:
Նկար 1. Սպանդարյանի ՀԷԿ-ի արտաքին տեսքը
