New Scientist հեղինակավոր ամսագիրը համաշխարհային գիտության կարեւորագույն նորույթների շարքում անդրադարձել է Վահագն Գուրզադյանի եւ Ամուր Մարգարյանի (Ալիխանյանի անվան ազգային գիտական լաբորատորիա, ԵՊՀ) հետազոտությանը: https://www.newscientist.com/article/2176393-hidh-speed-electrons-prove-einstein-was-right-about-the-speed-of-light/
«Մեծ արագության էլեկտրոնները ապացուցում են, որ Էյնշտեյնը ճիշտ էր լույսի արագության վերաբերյալ» վերնագրով հոդվածում ասվում է, որ հեղինակներին հաջողվել է ամենամեծ ճշտությամբ ստուգել ֆիզիկայի հիմնարար օրենքներից մեկըՙ Էյնշտեյնի հարաբերականության հատուկ տեսության առանցքային դրույթը, այն էՙ լույսի արագության հաստատունությունըՙ անկախ դիտորդի սեփական արագությունից: Հեղինակները օգտագործել են «European Synchrotron Radiation Facility» ֆրանսիական արագացուցչի միջոցով իրենց մասնակցությամբ կատարված գիտափորձերի տվյալները: Հոդվածում բերվում են մանրամասներ այդ գիտափորձերից, ապա մեջբերում են Վ. Գուրզադյանին, որ «Գիտափորձերը իրականացվել են մեծ ճշգրտությամբ, հետեւելով զանազան երեւույթների ներդրմանը. ստացված արդյունքները մեծապես գերազանցում են նախկինում եղածները»:
Աղբյուրըՙ V.G. Gurzadyan, A.T. Margaryan, The light speed versus the observer: the Kennedy-Thorndike test from GRALL-ESRF, European Physical Journal C, (2018) 78:607
