«Մատեան պրեսի» կայքէջըՙ www.matianpress.com
2012թ. ամերիկաբնակ Հայկ Սվաճյանը նախաձեռնեց ու կյանքի կոչեց մի ծրագիր, որի բուն նպատակը բարեգործությունն էր, ավելի կոնկրետՙ 1988-ի երկրաշարժից տուժածներն ու Հայաստանի Հանրապետության զինված ուժերը:
Հայկը անվտանգության տեխնիկայի ինժեներ է, աստվածաբան, բանաստեղծ ու թարգմանիչ: Առաջնորդվելով լավ է քիչ, բայցՙ առկա, քանՙ հավանական, բայցՙ ոչ առկա կարգախոսով, նա այս տարիների ընթացքում կարողացել է հրապարակել 12 անուն գիրք, որոնց ողջ հասույթը ծառայել է բարեգործությանըՙ վերը նշված թիրախների վրա: Գրքերը լույս են տեսել «Մատեան պրես» մատենաշարով: Ինձ հետ զրույցում Հայկը նշեց, որ դժվար է եղել նախՙ տպագրելը, հետոՙ իրացնելն ու հարակից խնդիրները, բայց հպարտությամբ նշեց, որ իր գաղափարակից-համախոհները նրան շատ են օգնել այդ հարցերում: Նա բոլորից առանձնացրեց մատենաշարիՙ Հայաստանում ոչ պաշտոնական ներկայացուցիչ Արծվի Բախչինյանին , գրքերի ձեւավորող Նվարդ Երկանյանին , գրքերի պատկերազարդող Հայկ Համբարձումին :
Թվում էՙ վեց տարվա ընթացքում տասներկու գիրքն այնքան էլ շատ չէ, բայց միայն թարգմանված գրքերի ցանկն արդեն ցրում է թյուր կարծիքն ու խոսում այն մասին, որ աշխատանք է տարվել, այն էլՙ բավականին մեծ, եւՙ հենց այնպես ոչինչ չի արվել:
Լեոնիդ Անդրեեւ – «Հուդա Իսկարիովտացին» (վիպակ), ռուս. թարգմ. Ներսես Աթաբեկյանը , 2017:
Սոմերսեթ Մոեմ , «Վերեւումՙ առանձնատանը» (վիպակ), անգլերենից թարգմանեց Անահիտ Բաբայան-Զեյթունցյանը , 2017:
Շառլ Բոդլեր , «Չարի ծաղիկներ» (բանաստեղծություններ), ֆրանս. թարգմ. Հենրիկ Բախչինյանը , 2018:
Պատմվածքներ նկարիչների մասին (Բաստիան-Լըպաժ եւ Մարի Բաշկիրցեւ), Հերման Հեսսե, Քլինգզորի վերջին ամառը, Ալբեր քամյու, Ժոնաս կամ Արվեստագետն աշխատելիս: Ֆրանս. եւ գերման. թարգմ. Աշոտ Ալեքսանյանը , 2018:
Նինա Բերբերովա – «Նվագակցուհին» (վիպակ), ռուս. թարգմ. Հեղինե Մուրադյանը , 2015:
Ահա, միայն այսքանը բավարար էՙ հասկանալու համար, որ գրքերը հենց այնպես չեն ընտրված, նույնիսկ թարգմանիչների անունները հուշում են, որ ոչինչ հենց այնպես չի արված:
Հայկը շարունակում է իր ակտիվ գործունեությունն այս ասպարեզում եւ ակնկալում հայրենակիցների աջակցությունը, այն էՙ գրքերի սպառումն ու պրոպագանդումը: Արծի Բախչինյանն իր հերթին ասաց, որ Հայկն ակցիա է կազմակերպումՙ Գյումրու մի շատ կարիքավոր ընտանքի օգնելու համար. ակտիվ համագործակցության մեջ է «Օգնիր զինվորին» հիմնադրամի հետ:
«Մատեան պրես» մատենաշարով հրատարակված գրքերը վաճառվում են Երեւանիՙ Բուկինիստ, Նոյյան տապան, Զանգակ, Հայ գիրք եւ այլ գրախանութներում, ցուցադրվում են նաեւ «Սարգիս Մուրադյան» պատկերասրահում (Իսահակյան 38):
