ԼՐԱԳՐՈՂԻ ԵՆ ԾԵԾԵԼ
Լրագրող Տիրայր Մուրադյանը «Ազատություն» ռադիոկայանին հայտնել է, որ ՀՀ կառավարության 3-րդ մասնաշենքի մոտ իր մասնագիտական պարտականությունները կատարելիսՙ ծեծի է ենթարկվել: «Կառավարության շենքի մոտ ֆիքսեցի անձանց, որոնց վարքագիծը տարօրինակ էր: Իրենք իրենց հավաքի մասնակիցների պես չէին պահում: Երբ իրենք նկատեցին, որ իրենց ֆիքսել եմ, տեսադաշտից գնացին, բայց մի քանի րոպե հետո անսպասելի հայտնվեցին ասելովՙ ինչո՞ւ եմ նկարում ու սկսեցին հարվածել»:
Լրագրողը գտնվում է «Սուրբ Գրիգոր Լուսավորիչ» ԲԿ-ում: Հիվանդանոցի վերակենդանացման բաժանմունքի վարիչ Սամվել Կարապետյանը հայտնել է, որ Տիրայրը ստացել է գլխի փափուկ հյուսվածքների սալջարդ ձախ քունք-ծոծրակային հատվածում:
Ինքըՙ Տիրայրը, Ֆեյսբուքի իր էջում հայտնել է, որ արդեն լավ է զգում, սակայն դեռ պետք է մնա բժիշկների հսկողության տակ:
Գլխավոր դատախազությունից էլ հայտնում են, որ լրագրողի հաղորդագրության հիման վրա հարուցվել է քրեական գործ, կատարվում է նախաքննություն:
