Գերմանիայումՙ ամեն երկրորդը
Ռոբերտ Կոխ ինստիտուտը դեկտեմբերի 6-ին Բեռլինում ներկայացրել է Գերմանիայում քաղցկեղով հիվանդների թվի կտրուկ աճի պատկերըՙ ամեն երկրորդը կյանքի որոշակի հատվածում հիշյալ հիվանդությունն ունեցել է: Նույն աղբյուրի մեկնաբանմամբ, պատճառը կյանքի տեւողության նկատելի աճն էՙ որքան տարիքն առաջանում է, քաղցկեղով հիվանդանալու հավանականությունը մեծանում է: Հիվանդ կանանց թիվն աճել է 9, տղամարդկանցըՙ 6 տոկոսով: Ամենաշատը տարածված է կանանցՙ կրծքագեղձի, տղամարդկանցՙ շագանակագեղձի քաղցկեղը: Եվրոպայում ամեն 8-10-րդ կինը կրծքագեղձի քաղցկեղ ունի, նշվում է նույն ինստիտուտի հաղորդագրության մեջ, որ դեկտեմբերի 7-ին հրապարակեց նաեւ «Բայերիշե ռունդֆունկը»:
Քաղցկեղով հիվանդներին խորհուրդ է տրվում շարժուն լինել, ընդգծում են գերմանացի գիտնականները: Շատ կարեւոր է, որ հիվանդն անօգնական, անտրամադիր լինելու փոխարեն ակտիվ լինի, քանի որ շարժումը նպաստում է արյան պատկերի դրական փոփոխությանը, հետեւաբարՙ ապաքինմանը:
