Հ. Ծ., (The Armenian Mirror-Spectator)
Ամերիկյան «Newsweek» եւ «Wall Street Journal» պարբերականները շարունակում են ուշի-ուշով հետեւել Մ. Նահանգների հատուկ խորհրդական Ռոբերտ Մուելերիՙ Մայքլ Ֆլինի գործով հետաքննության բացահայտմանը (տե՛ս «Ազգի» նոյեմբերի 24-ի համարում «Ֆլինի խճճված ոստայնը» հոդվածը):
«Ուոլ Սթրիթ Ջոռնըլը» իր նոյեմբերի 10-ի համարում մասնավորապես նշում է, որ Մուելերն այժմ հետաքննում է Թուրքիայից ստացած որոշակի գումարի դիմաց Ֆլինի պարտավորությունըՙ առեւանգելու եւ Թուրքիային հանձնելու 1999-ից Պենսիլվանիայում ապրող 75-ամյա թուրք հոգեւորական Ֆեթուլլահ Գյուլենին, որին Օբամայի կառավարությունը մերժել էր արտահանձնել Թուրքիային: Ենթադրվում է, որ նա հատուկ ինքնաթիռով Գյուլենին պետք է հասցներ Իմրալիի բանտը(*): Թուրքիան, ինչպես ակնկալվում էր, «լրիվ սուտ եւ անհիմն» է որակել նման ենթադրությունը: Բայց որոշ քաղաքագետներ հնարավոր են համարում նման քայլը, քանի որ այն Թուրքիայի կառավարությանը դիվիդենտներ կբերեր երկրի ներսում իր դիրքերը ամրապնդելու առումով: «Այդ «հաղթանակը» մեծապես կգերակշռեր որեւէ միջազգային սկանդալ» «Նյուզուիքին» ասել է տեխնոլոգիաների մոնիտորինգով զբաղվող «Turkey Blocks»ի հիմնադիր Ալպ Թոքերը : Դրան պետք է գումարել նաեւ այն բազմաթիվ հոդվածները, որ Ֆլինն ստորագրել է թերթերում կողմ արտահայտվելով Գյուլենի արտահանձնմանը: Գյուլենն ինքը «France 24-ին» տված իր հարցազրույցում նշել է, որ տեղյակ է այդ գործում Ֆլինի ներգրավման մասին: «Տեղեկացել եմ, որ Էրդողանի փեսան տեսակցել է Ֆլինի հետ եւ նրա ընկերությանը բավական մեծ գումար փոխանցել», ասել է Գյուլենը:
«Իրավական եւ քաղաքական հիմնավորումները չափազանց սահմանափակ են նրան արտահանձնելու համար», նշել է իր հերթին «Istanbul Policy Center»-ի աշխատակից Մագդալենա Քիրչները :
(*) Այս բանտը մեր ընթերցողներին ծանոթ է որպես կալանավայրը քուրդ առաջնորդ Աբդուլլահ Օջալանի (Ապո), որին ամերիկյան հատուկ ծառայությունների աշխատակիցները առեւանգելով հանձնեցին թուրքական ոստիկանությանը:]
