Ազգային վիճակագրական ծառայությունը հրապարակել է այս տարվա առաջին եռամսյակում Հայաստան այցելած զբոսաշրջիկների եւ Հայաստանից որպես զբոսաշրջիկ արտերկիր մեկնածների թվերը: Համաձայն այդ հրապարակումների, 2017 հունվար-մարտին Հայաստան է ժամանել 298 533 զբոսաշրջիկ, կամ 2016-ի նույն ժամանակաշրջանի նկատմամբՙ 18,2 տոկոսով ավելի:
Այս անգամ վիճակագրական ծառայությունը առանձնացրել է հյուրանոցներում հանգրվանածներին եւ բարեկամի տանը կամ վարձով բնակարանում հանգրվածներին: Համաձայն այդ տվյալների, Հայաստան այցելածներից 41 696 մարդ հանգրվանել է հյուրանոցային տնտեսություններումՙ ինչը 36,2 տոկոսով ավելի է նախորդ տարվա նույն ժամանակահատվածի համեմատ, իսկ 256 837-ըՙ բնակվել են բարեկամի տանը կամ վարձով, ինչը 15,8 տոկոսով է ավելի նախորդ տարվա նույն ժամանակահատվածից: Այդուհանդերձ, Զբոսաշրջության համաշխարհային կազմակերպության չափանիշներով բոլորն էլ համարվում են միջազգային զբոսաշրջիկ (անձը, որը հանգստանալու, բուժվելու, հարազատներին այցելելու, գործնական,կրոնական կամ այլ նպատակներով ճանապարհորդում է իր հիմնական բնակության վայրից մեկ այլ վայր ոչ պակաս քան 24 ժամ եւ ոչ ավել քան անընդմեջ 1 տարի ժամանակով):
Ըստ հյուրանոցային տնտեսության օբյեկտներից ստացված հաշվետվությունների, նշված ժամանակահատվածում ՀՀ այցելած զբոսաշրջիկների 26,1 տոկոսը բաժին է ընկել ԱՊՀ երկրներին, 14,2 տոկոսը` ԵՄ երկրներին եւ 59,7 տոկոսը` այլ երկրների:
Ինչ վերաբերում է Հայաստանից արտերկիր մեկնող զբոսաշրջիկներին, ապա 2017-ի հունվար-մարտին նրանց թիվը կազմել է 266 324 մարդ կամ 2016-ի համապատասխան ժամանակաշրջանի համեմատՙ 17,1 տոկոսով ավելի: Հայաստանից զբոսաշրջության նպատակով մեկնողները գրեթե ամբողջությամբ դա արել են ինքնուրույն, եւ զբոսաշրջային գործակալությունների միջոցով արտերկիր մեկնել է ընդամենը 498 մարդ:
