Թուրքական MIT հետախուզությունը Գերմանիայում ունի իրազեկիչների հսկայական ցանց: Այդ մասին հաղորդում է գերմանական Die Welt թերթը, վկայակոչելով գերմանացի մի անանուն քաղաքական գործչի: Նրա խոսքերով, ամբողջ երկրում այդ ցանցի մեջ մտնում են «թուրքական հետախուզության մոտ 6 հազար գաղտնի իրազեկիչներ»:
«Արդեն վաղուց մեծ մասամբ շեշտը դրվում է ոչ այնքան հետախուզական տվյալների ստացման, որքան ճնշումների իրականացման վրա», ընդգծում է անվտանգության հարցերի գերմանացի փորձագետ Էրիխ Շմիդտ-Էենբոմը: Նա նշում է, որ «նույնիսկ արեւելագերմանական «Շթազիին» չէր հաջողվել Գերմանիայում ստեղծել իրազեկիչների այդքան ծավալուն ցանց»:
«Կանաչների» կուսակցության պատգամավոր Հանս-Քրիստիան Շտրեբելեն նույնպես խոստովանում է, որ MIT-ը Գերմանիայի տարածքում ծավալել է «աներեւակայելի գաղտնի գործունեություն»: Նա երկրի սահմանադրության պահպանման գերատեսչությանը, BND դաշնային հետախուզական ծառայությանը եւ ոստիկանությանը արդեն կոչ է արել շտապ կարգով վերանայել համագործակցությունը Թուրքիայի հետ:
