Համաշխարհային կինոարվեստի շունչը մեկ շաբաթ մայրաքաղաքում տարածած հերթական «Ոսկե ծիրանն» ինքնատիպ էր միջոցառումների բազմազանությամբ, ճանաչված կինոգործիչների, հյուրերի մասնակցությամբ եւ բազմաժանր ֆիլմերի ցուցադրությամբ: 13-րդ «Ոսկե ծիրանը» հրաժեշտ տվեց մայրաքաղաքինՙ մրցանակի արժանացնելով հաղթողներին: Հայկական կինոյում ունեցած մեծ ավանդի համարՙ «Եղիցի լույս» հատուկ մրցանակին արժանացավ ռեժիսոր Ռոման Բալայանը :
Փառատոնային շաբաթը հագեցած էր իրադարձություններով. Հայաստանի Հանրապետության անկախության 25-ամյակին նվիրված «Հայկական կինո. արդի ժամանակներ» ծրագրի իրականացում, ֆիլմերի ցուցադրություն, կլոր սեղան-քննարկումներ, վարպետության դասեր, որոնք անցկացրեցին Ֆրեդ Քելեմենը (Գերմանիա, ռեժիսոր/օպերատոր), Ժելիմիր Ժիլնիկը (Սերբիա, ռեժիսոր), Վիտալի Մանսկին (Ռուսաստան, ռեժիսոր), Հոմայուն Էրշադին (Իրան, դերասան) եւ Անդրեյ Լոշակը (Ռուսաստան, ռեժիսոր), Հայաստանի կինեմատոգրաֆիստների միության նախագահ, ռեժիսոր Ռուբեն Գեւորգյանցին նվիրված երեկոյի անցկացում, ռեժիսորներ Ժելիմիր Ժիլնիկի եւ Ֆրեդ Քելեմենի ֆիլմերի հետահայաց ցուցադրություններ եւ այլն:
Փառատոնը նշանավորվեց հայ-թուրքական կինոպլատֆորմի նախագծերի զարգացման հերթական աշխատաժողովի անցկացմամբ: Ռեժիսորներ Առնո Խայաջանյանը («Բարի գալուստ, Անատոլիա») եւ Իննա Սահակյանը («Ավրորայի արեւածագը») պարգեւատրվեցին համապատասխանաբարՙ 7500 եւ 5000 ԱՄՆ դոլար մրցանակով:
Փառատոնն իր ներկայությամբ պատվեց հանրահայտ դերասանուհի, մեծանուն ռեժիսորների ֆիլմերի աստղ Ժակլին Բիսեթը : Հանդիսատեսը հանրահայտ երեք կինոնկար դիտեց նրա դերակատարմամբ:
13-րդ «Ոսկե ծիրան»-ը հարգանքի տուրք մատուցեց փառատոնի լավագույն բարեկամ, ճանաչված ռեժիսոր, երջանկահիշատակ Աբաս Քիառոսթամիի հիշատակին: «Մոսկվա» կինոթատրոնում ցուցադրվեց նրա «Բալի համը» կինոնկարը, իսկ «Դալան» պատկերասրահում բացվեց «Ճանապարհ» խորագրով լուսանկարների ցուցահանդեսը:
«Ոսկե ծիրան» 13-րդ միջազգային կինոփառատոնը ներկայացրեց նաեւ «Ֆրանսիական նոր կինո», «Գերմանական կինոյի օր», «Շեքսպիրն ապրում է կինոյում», «Լեհական կինոյի օր» ծրագրերը, որոնք իրականացվում են ՀՀ-ում օտարերկրյա դեսպանությունների հետ համագործակցությամբ: Իսկ «Երեւանյան պրեմիերաներ»-ի շրջանակում հանդիսատեսին ներկայացվեցին երբեւէ մեծ էկրանին չցուցադրված ֆիլմեր: Մեկշաբաթյա կինոտոնի պաշտոնական փակումն ազդարարեցին «Ոսկե ծիրանի» հիմնադիր տնօրեն Հարություն Խաչատրյանն ու փառատոնի գլխավոր գործընկեր կազմակերպությանՙ ՎիվաՍել-ՄՏՍ-ի գլխավոր տնօրեն Ռալֆ Յիրիկյանը : Սիրված կինոտոնը եզրափակվեց աշխարհահռչակ բելգիացի ռեժիսորներ Դարդեն եղբայրների վերջինՙ «Անծանոթուհին» ֆիլմի ցուցադրությամբ:
«Հերթական «Ոսկե ծիրանն» ավարտեց իր աշխատանքները, բայց ոչՙ առաքելությունը: Հայաստանում սիրված կինոփառատոնն իր երկրպագուներին թողնում է իրենց մտորումների, ստացած տպավորությունների եւ վերլուծությունների ազատության մեջՙ մինչեւ նոր հանդիպում: Որքանո՞վ հանդիսատեսը ներշնչվեց գեղեցիկ մտածելու, ապրելու եւ ստեղծելու ցանկությամբՙ ցույց կտա ժամանակը: Աշխարհի առջեւ բաց պատուհան դարձած փառատոնը համամարդկային արժեքներ փոխանցող դեսպան է տարբեր մշակույթներով առաջնորդվող մի շարք ազգերի համար», – ասաց ՎիվաՍել-ՄՏՍ-ի գլխավոր տնօրեն Ռալֆ Յիրիկյանը:
