Բունդեսթագում Հայոց ցեղասպանության ճանաչումից ի վեր (02.06.2016) Թուրքիայի հայերն ապրում են վախի մթնոլորտում, հայ սրբազանը «համերաշխություն» է հայտնում նախագահ Էրդողանին, մինչ հայոց պատրիարքի հավատացյալների հոտը երկյուղում է վրեժից ու բռնարարքներից, պատմում է իտալացի կաթոլիկների AsiaNews թերթը (Հռոմ): Թուրքիայի շուրջ 100 հազար էթնիկ հայերը «թակարդված» են ատելությամբ համակված երկրում եւ տագնապահար սպասում են ծայրահեղ ազգայնական խմբերի պատասխան գործողություններին, խմբեր, որոնք կարող են օգտվել թուրքական իշխանությունների, հատուկ ծառայությունների եւ զինվորականների աջակցությունից: Դա նախագահ Էրդողանի ցասումնալի ելույթների արդյունքն է: Իր ելույթներում նա մասնավորապես հայտարարել էր, որ կարող է երկրից արտաքսել ինչպես թուրքահպատակ, այնպես էլ ներգաղթյալ հայերին: Իտալական հիշյալ թերթի թղթակցի հետ զրուցած տաճկահայերը խոսել են ներկայումս համայնքում տիրող «վախի մթնոլորտի» մասին: Կառավարության տեղեկատվական քաղաքականությունն այնքան «հայատյաց է դարձել, որ հնարավոր են ամենաանսպասելի հետեւանքներ: Հայ նախկին ուսուցիչներից մեկն ասում է, որ Թուրքիայում հայերն իրենց զգում են իբրեւ «պատանդներ»: Նրա խոսքերովՙ Թուրքիան չի կարող ընդունել, որ Գերմանիան խոստովանեց սեփական պատասխանատվությունը հայերի բնաջնջման համար, դրանով իսկ Անկարային զրկելով մեղքի իր բաժինը ժխտելու հնարավորությունից: Լարվածությունը թուլացնելու ակնկալիքով Հայաստանյայց Առաքելական եկեղեցու Կոստանդնուպոլսի Պատրիարքական փոխանորդ Արամ արք. Աթեշյանը, որը կուզենար ապագայում պատրիարք դառնալ Էրդողանի օգնությամբ, երկարաշունչ նամակ է գրել Թուրքիայի նախագահին: Այնտեղ նա գրում է, որ Բունդեսթագի ընդունած բանաձւեը «խոր ափսոսանք է առաջացրել հայ ժողովրի մեջ»: Տեղապահը պարզապես կրկնել է Էրդողանի ասածը, երբ վերջինս Գերմանիային քննադատել էր, կանցլեր Մերկելի բնորոշմամբ, «անընդունելի» խոսքերով:
Այդուհանդերձ արքեպիսկոպոսի դիրքորոշումը հասկանալի է: Որպես Պոլսո ապագա պատրիարք, նա պարտավոր է իր հոտը պաշտպանել թուրք ազգայնականների բացասական հակազդեցությունից եւ Էրդողանի իսլամիստական ծայրահեղականությունից:
Ի դեպ, հայկական մամուլը պակաս ներողամիտ գտնվեց փոխանորդի խոսքերի հանդեպ: Սփյուռքի հայերը Աթեշյանին կոչ են անում գործել «որպես Քրիստոսի եկեղեցու ճշմարիտ առաջնորդ» եւ Ֆրանցիսկոս պապից սովորել «արիություն» բառի իմաստըՙ վկայակոչելով 2015 թ. ապրիլի 12-ին Հռոմի Սբ Պետրոսի տաճարում Հայոց ցեղասպանության վերաբերյալ նրա արած հայտարարությունը:
Ինչ վերաբերում է Ստամբուլի (Կոստանդնուպոլսի) Սբ Սոֆիա տաճարում մահմեդական աղոթքների ընթերցում սկսելուն, KATHPRESS գործակալությունը տեղեկացնում է, որ պաշտոնական Բեռլինը զուսպ կերպով արձագանքեց դրան: Գերմանիայի արտգործնախարարության մամլո քարտուղարը հայտարարեց, թե Անկարայի այդ քայլը Թուրքիայի ներքին գործն է: Այդուհանդերձ նա ցանկություն հայտնեց, որ համաշխարհային ժառանգության մաս հանդիսացող շենքի օգտագործումը տեղի ունենա առանց դրա կարգավիճակին «վնասելու»: Իրենց հերթին որոշ թուրք քաղաքական գործիչներ, իբրեւ պատրվակ օգտագործելով Հայոց ցեղասպանությանն առնչվող բանավեճը, կոչ են արել այսուհետեւ ուշադրություն չդարձնել արեւմուտքցի քրիստոնյաների դիրքորոշմանը եւ առաջարկել են նախկին քրիստոնեական տաճար Սբ Սոֆիան վերստին դարձնել մզկիթ:
