«Ալ Ղաիդա» միջազգային ահաբեկչական խմբավորումը մտադիր է սեփական խալիֆաթ ստեղծել Սիրիայում, տեղեկացնում է գերմանական «Die Welt» թերթը:
Հաղորդվում է, որ խմբավորման ինքնակոչ առաջնորդ Այման ազ-Զաուահիրին իր կողմնակիցներին ուղղված ձայնագրված ելույթում արմատական իսլամի հետեւորդներին կոչ է արել միավորվել եւ Սիրիան անվանել է «աշխարհի բոլոր մահմեդականների մեծ հույս»:
Ազ-Զաուահիրին նշել է, որ ինքը պատրաստ է հանուն նման խալիֆաթի ստեղծման հրաժարվել իր իշխանությունից եւ նախաձեռնությունը հանձնել «Ալ Ղաիդայի» ճյուղավորումը հանդիսացող «Ան-Նուսրա ճակատին»: «Եթե նրանք կազմեն մահմեդական կառավարություն եւ իմամ ընտրեն, ապա նրանց ընտրությունը կլինի մեր ընտրությունը», հայտարարել է խմբավորման առաջնորդը:
Ինչպես նշում է թերթը, «Ալ Ղաիդայի» գրոհայինները արդեն մի քանի տարի է, ինչ ծրագրում են ստեղծել սեփական խալիֆաթ: Հավանական է, որ ազ-Զաուահիրիի տվյալ ելույթը նրանց դրդի դիմելու վճռական գործողությունների, իսկ դա կարող է վտանգավոր հետեւանքներ ունենալ ինչպես Սիրիայի, այնպես էլ տարածաշրջանի համար:
Ավելի վաղ հաղորդվել էր, որ «Ան-Նուսրա ճակատը» երկարաժամկետ հեռանկարով արեւմտյան աշխարհի համար է՛լ ավելի մեծ վտանգ է ներկայացնում, քան «Իսլամական պետությունը»:
