Բաքվում գտնվող ՌԴ արտաքին գործերի նախարար Սերգեյ Լավրովն, ըստ ադրբեջանական աղբյուրների հայտարարել է, թե ղարաբաղյան կարգավորման համաձայնագիրն արդեն պատրաստ է:
«Համաձայնագրի բոլոր բաղադրիչները սեղանին են: Իրականում մենք շատ մոտ ենք Լեռնային Ղարաբաղի հարցի լուծմանը: Երեկ Բաքվում անցկացրած հանդիպումները եւ վաղը Հայաստանում կայանալիք հանդիպումներն արտացոլում են մեր գործադրած ջանքերը»,- ասել է ՌԴ արտաքին գործերի նախարար Սերգեյ Լավրովը: Այս մասին տեղեկացնում է ադրբեջանական ԱՊԱ գործակալությունը:
ՀՀ արտաքին գործերի նախարարության մամուլի խոսնակ Տիգրան Բալայանը արձագանքել է ՌԴ ԱԳ նախարար Սերգեյ Լավրովի` Բաքվում արած հայտարարությանը, որը վերաբերում է «սեղանի վրա» առկա պայմանավորվածություններին: «2011 թ. կողմերին ներկայացված Կազանի փաստաթուղթը բանակցությունների սեղանին է: Ադրբեջանը հրաժարվում է այն ընդունել, չնայած որ նախօրոք համաձայնեցվել է Բաքվի հետ: Մենք բազմիցս խոսել ենք այդ մասին: Դեռեւս Կազանում հանդիպման ժամանակ Ադրբեջանի նախագահ Իլհամ Ալիեւը ներկայացրել է տասը նոր առաջարկ եւ փաստացի խափանել է կարգավորման սկզբունքների համաձայնեցումը»:
