ՄԱՅՐՈՒԹՅԱՆ ՈՒ ԳԵՂԵՑԿՈՒԹՅԱՆ ՏՈՆԻ ԱՌԹԻՎ

ԱՐԱ ԱԲՐԱՀԱՄՅԱՆ

Համաշխարհային հայկական կոնգրեսի եւ Ռուսաստանի հայերի միության նախագահ Արա Աբրահամյանը ուղերձ է հղել մայրության եւ գեղեկցության տոնի կապակցությամբ.

Թանկագին հայրենակցուհիներ,

Հայաստանում եւ Սփյուռքում որպես մայրության եւ գեղեցկության տոն նշվող ապրիլի 7-ն այս տարի արտասովոր օր է:

Մեր սրտերը լցված են հպարտությամբ եւ անսահման երախտագիտությամբ Ձեր նկատմամբ այն վեհանձնության եւ արժանապատվության համար, որով դուք դիմակայեցիք ադրբեջանական ագրեսիայի չորս օրերի ընթացքում հայ ժողովրդի վրա հասած փորձություններին:

Մեր խորին վշտակցությունն ենք հայտնում մեր մայրերին, ում Հերոս զավակներն իրենց կյանքը զոհաբերեցին Արցախի ազատության համար: Մենք գլուխ ենք խոնարհում Ձեր դաստիարակած զավակների առջեւ եւ հպարտանում նրանց սխրանքներով:

Խոնարհվում եմ Ձեր առջեւ, թանկագին մայրեր: Այսօր Դուք իսկական Հերոսներ եք. ի հեճուկս ամենի Դուք կարողացել եք պահպանել հայ ժողովրդի ազգային նկարագրի լավագույն հատկանիշներըՙ նվիրվածությունն ընտանիքին, ժողովրդին, ազգային ավանդույթներին, ինչպես նաեւ բարությունն ու քնքշանքը:

Ի սրտե մաղթում եմ Ձեզ տոկունություն, առողջություն եւ կանացի երջանկություն:

Խորին հարգանքովՙ