Հինգշաբթի օրը ոստիկանությունը հանդես եկավ լրագրողներին ուղղված կոչովՙ «Կոչ ենք անում զանգվածային լրատվության միջոցների ներկայացուցիչներին, հատկապես «Ազատություն» ռադիոկայանի լրագրողներինՙ իրադարձությունները լուսաբանելիս պահպանել իրավապահների հետ աշխատանքի եւ լրագրողական էթիկայի կանոնները: Եթե ոստիկանները որեւէ գործողություն են իրականացնում, պահպանեք անհրաժեշտ տարածություն: Անհիմն եւ իրականության հետ որեւէ կապ չունեցող մեկնաբանություններով մի փորձեք սրել իրավիճակը: Հիշեք, որ անփաստարկ ու կողմնակալ հայտարարություններով դառնում եք իրադարձության կողմ, ինչը հակասում է լրագրության տարրական կանոններին»:
Ոստիկանությունը, սակայն, մի շատ կարեւոր հարցի չի պատասխանել. ո՞վ է Գ. Շամշյանը: Եթե լրագրող է, ապա ինչո՞ւ է նրան կարելի իրադարձությունները լուսաբանելիսՙ իրավապահների հետ աշխատանքի եւ լրագրողական էթիկայի կանոնները խախտել, երբ ոստիկանները որեւէ գործողություն են իրականացնումՙ անհրաժեշտ տարածություն չպահպանել եւ, վերջապես, կողմնակալ հայտարարություններով իրադարձության կողմ դառնալ, այդպիսով խախտել լրագրության տարրական կանոնները: Ու եթե դա կարելի է լրագրողներից մեկին, ապա ինչո՞ւ չի կարելի բոլոր լրագրողներին: Իսկ, եթե Գ. Շամշյանը լրագրող չէ, ապա ինչո՞ւ էր երեկ լուրեր տարածում, թե ժամը 20:45-ին Մոսկվա-Երեւան չվերթի ինքնաթիռում ռումբ կա տեղադրված, այն պարագայում, երբ այդ ժամին Մոսկվա-Երեւան չվերթ չկար եւ հետեւաբար ռումբ չկար: Եւ առհասարակ, նման կեղծ լուրեր տարածողն ո՞վ է…
