ՊՈՒՏԻՆԸ ՀԵՌԱՆՈ՞ՒՄ, ԹԵ՞ ՎԵՐԱԴԱՌՆՈՒՄ Է ՍԻՐԻԱ

ԱՆ. Հ., Գերմանիա

Եթե հարկ լինի, Ռուսաստանը մի քանի ժամվա ընթացքում իր զինուժը կամրապնդի տարածաշրջանում, ըստ գերմանական լրատվամիջոցների, մարտի 17-ին հաղորդել է Վլադիմիր Պուտինը Մոսկվայում: Երկուշաբթի ՌԴ նախագահը անակնկալ հայտարարել էր Սիրիայից զորքի դուրսբերման մասին, քանի որ ընդհանուր առմամբ հանձնառությունը կատարված է համարում: Գերմանացիները շաբաթասկզբին թերահավատ էին Ղրիմը Ռուսաստանի տարածք հռչակած ՌԴ նախագահիՙ Սիրիայից նահանջի հայտարարության վերաբերյալ, իսկ երեկ ընդգծեցին, թե այդուհանդերձ Պուտինը ցուցադրաբար շարունակում է թիկունք լինել Բաշար ալ Ասադինՙ նրան անվանելով կառուցողական փոխզիջումների եւ երկխոսության պատրաստ: Գերմանական ԶԼՄ-երը նշում են, թե Կրեմլի ղեկավարը գովել է ԱՄՆ – ինՙ զինադադարի հարցում Վաշինգտոնի հետ համագործակցությունը անվանելով դրական, կառուցողական: Պուտինը նշել է, թե Սիրիայում իրենց ներկայությունը 33 միլիարդ ռուբլի ( 420 միլիոն եվրո ) է կազմել: