ԵՀՀ-Ի ԿԱԶՄԱԿԵՐՊԱԾ ԳԻՏԱՀԵՏԱԶՈՏԱԿԱՆ ԽՈՐՀՐԴԱԺՈՂՈՎԻ ԿԱՊԱԿՑՈՒԹՅԱՄԲ
Տեղեկատվական բաժանմունք, 03 Մարտի 2016թ.
Եվրոպայի Հայերի Համագումարի նախաձեռնությամբ, սույն թվականի մարտի 4-6-ը Գերմանիայի Դույսբուրգ ավանում, տեղի է ունենալու հայության հիմնահարցերին նվիրված գիտահետազոտական խորհրդաժողովՙ
«ՀԱՅՈՒԹՅՈՒՆԸ ՑԵՂԱՍՊԱՆՈՒԹՅԱՆ 100-ՐԴ ՏԱՐԵԼԻՑԻ ԱՎԱՐՏԻՆ»
ընդհանուր խորագրով, ուր քննարկման նյութ են դառնալու, այնպիսի թեմաներ ինչպիսիք են.
– Ցեղասպանություն եւ պահանջատիրություն,
– Հայկական պահանջատիրությունը, Արեւմտյան Հայաստանը եւ միջազգային օրենքը,
– Հայոց ցեղասպանության 100-տարելիցի առիթով, անցյալ մեկ տարվա ընթացքում իրականացված աշխատանքները, նրա քաղաքական գնահատականը եւ ապագա գործունեության հեռանկարները,
– Հայաստանի Հանրապետության իրավիճակը եւ նրա զարգացման հեռանկարները,
– Արցախի հիմնահարցի լուծման ընթացքը եւ հեռանկարները,
– Սփյուռք, սահմանումներ, խնդիրներ, հեռանկար,
– Միջին Արեւելքի հայկական համայնքների դրությունը,
– Հայաստան-Սփյուռք հարաբերությունների ներկա վիճակը եւ ներդաշնակ գործունեության համար անհրաժեշտ փոփոխությունները,
– Տարածաշրջանային զարգացումները եւ մեր անելիքները,
– Թուրքիան եւ տարածաշրջանային զարգացումները,
– Թուրքիայի աշխարհաքաղաքական դիրքը 21-դարում եւ փոքրամասնությունների հանդեպ վարած նրա քաղաքականությունը,
Յուրաքանչյուր նիստի ավարտին քննարկման են դրվելու ներկայացված հարցերը, եւ եզրափակիչ քննարկումից հետո, լինելու է բանաձեւերի ընդունում:
Խորհրդաժողովի ընթացքում զեկուցումներ են լինելու Գերմանիայի եւ Ռուսաստանի ու նաեւ համառոտ կերպով եվրոպական մյուս երկրների հայկական համայնքների մասին:
Խորհրդաժողովին զեկուցումներով հանդես են գալու Եվրոպայի տարբեր երկրներիցՙ Հայաստանից, Շվեդիայից, Ֆրանսիայից, Ռուսաստանից, Մեծ Բրիտանիայից ու Թուրքիայից այցելած պատվիրակներ: Մի քանի երկրներից կզեկուցեն նաեւ ինտերնետային կապի միջոցով:
Խորհրդաժողովի բացումը կատարվելու է Եվրոպայի Հայերի Համագումարի նախագահ Կարո Հակոբյանի խոսքերով եւ Տենոր Մասիս Առաքելյանի Կոմիտասյան մի քանի երգերով:
Խորհրդաժողովի ընթացքում նախատեսված է ազատ մտքերի փոխանակման հնարավորություն, երկխոսություններ ու նաեւ հանդիպում տեղի հայ համայնքի հետ:
Խորհրդաժողովի առիթով հրապարակվելու է ամենօրյա լրատվություն:
Եւրոպայի Հայերու Համագումար
