Գործազրկության նպաստների վերացումը դժգոհություններ առաջացրեց այն մարդկանց մոտ, որոնք երկու տարին մեկ անգամ կարող էին 4 ամսվա ընթացքում ամսական 16 հազար դրամ նպաստ ստանալ: Սակայն կառավարության մոտեցումն անփոփոխ մնաց` հատկացվող գումարները փոշիանում էին առանց արդյունք տալու, այնինչ դրանք պետք է նպատակային օգտագործվեին: Այդ նպատակով, օրինակ` 2014-ին Արմավիրի մարզում փորձարկվեց, ապա ամբողջ Հայաստանի տարածքում ներդրվեց ժամանակավոր զբաղվածության ծրագիր: Այն գյուղացին, ով ունի գյուղատնտեսական նշանակության հող, բայց ֆինանսական դժվարություններ, պետությունից գումար է ստանում իր հողակտորը մշակելու համար:
Այս տարվա հոկտեմբերի 15-ին կառավարությունը հաստատեց եւս մեկ ծրագիր Տավուշի մարզում` հատկացնելով 60 մլն դրամ: Այս ծրագրով Տավուշի մարզի 30 համայնքներից յուրաքանչյուրում 10-15 գործազուրկների համար ապահովվում է ժամանակավոր` 2 ամսվա զբաղվածություն: Այդ անձանց հետ համայնքի ղեկավարը կկնքի պայմանագիր` յուրաքանչյուր աշխատած օրվա համար հատկացնելով 5000 դրամ: Դրա դիմաց ծրագրում ընդգրկվածները աշխատանքներ կիրականացնեն 6 հիմնական ոլորտներում. 1. սոցիալական ենթակառուցվածքի օբյեկտների (դպրոց, մանկապարտեզ, բուժհիմնարկ, մանկատուն, ծերանոց եւ այլն) հարակից տարածքների բարեկարգում, 2. միջհամայնքային եւ ներհամայնքային ճանապարհների, խճուղիների, մայթերի, այգիների, պուրակների, խաղահրապարակների բարեկարգում, լուսավորում, սանիտարական մաքրում, կանաչապատում, ծառատնկում, 3. արտակարգ իրավիճակների հետեւանքների վերացման օժանդակ աշխատանքներ, 4. պետական պատմական հուշարձանների, թանգարանների, եկեղեցիների հարակից տարածքների բարեկարգում, 5. գերեզմանատների ցանկապատում, բարեկարգում, 6. բնակչության համար պաշտպանական նշանակություն ունեցող ինժեներական կառույցների շինարարական աշխատանքներ:
