«Երկրում էլեկտրաէներգիա արտադրող ակտիվների պատմականորեն ձեւավորված կառուցվածքն է հիմնական խնդիրը, քանի որ այն ակտիվները, որոնք ձեւավորվում են, ունեն որոշակի կառուցվածք եւ նրանց ձեւավորած արտադրանքով է որոշվում սակագինը: Չնայած ոչ թանկ հիդրո եւ ատոմային էլեկտրաէներգիայի արտադրությանըՙ միշտ կա եզրափակիչ կայանի դերը: Եզրափակիչ կայանը մեզ մոտ հանդիսանում է Հրազդանի ՋԷԿ-ը, որն ունի բարձր ինքնարժեք, ինչի հետեւանքով կան խնդիրներ եւ ի վերջո սակագնի բարձրացում հատկապես այն պարագայում, երբ էժան հիդրոռեսուրսները կամ ատոմակայանն ինչ-ինչ պատճառներով հնարավոր չի լինում ամբողջովին օգտագործել: Երկրորդՙ ի տարբերություն հարեւան երկրների, մենք չունենք խաչաձեւ սուբսիդավորման հնարավորություն, ասենքՙ տրանզիտով գնացող գումարների ուղղում դեպի սակագնի նվազեցում եւ այլն», անդրադառնալով «Դելոյթ ընդ Տուշ» միջազգային խորհրդատվական ընկերության ներկայացրած էլեկտրաէներգիայի սակագներին առնչվող գործընթացի ուսումնասիրության առաջին փուլի հաշվետվությանը, երեկ կառավարության նիստի սկզբում նշեց փոխվարչապետ, միջազգային տնտեսական ինտեգրման եւ բարեփոխումների նախարար Վաչե Գաբրիելյանը:
Փոխվարչապետը փաստեց, որ ի վերջո «Դելոյթ ընդ Տուշ» ընկերությունը եզրակացրել է, որ ՀԷՑ-ում ֆինանսական միջոցների պակասորդն իրենց վրա արդեն զգացել էին էլեկտրաէներգիա արտադրող ընկերությունները, ինչը կարճաժամկետ հեռանկարում կառաջացներ սպառնալիք երկրի ողջ էներգահամակարգի կայունության համար: Այս պայմաններում սակագնի բարձրացման վերաբերյալ կարգավորող մարմնի որոշումնՙ ուղղված ոլորտում իրադրության կայունացմանը եւ սպառողների հուսալի էներգամատակարարման պահպանմանը, համարվում է հիմնավորված: «Հիմնական հարցադրված պահանջներըՙ արդյոք հիմնավորվա՞ծ է եւ ի՞նչ կլիներ, եթե չլիներ որոշումը, մենք ստացել ենք հստակ պատասխան առաջին փուլի արդյունքներով», հայտնեց Վաչե Գաբրիելյանը:
