Սեպտեմբերի 8- ին Փարիզում կոնֆերանս է գումարվել «Կրոնական հանդուրժողականություն. համակեցության մշակույթը Ադրբեջանում» թեմայով, իրազեկում է ադրբեջանական պետական AZERTAC գործակալությունը, որ իր լուրերն ադրբեջաներենին զուգահեռ փութաջան տարածում է նաեւ ռուսերեն, անգլերեն, ֆրանսերեն, գերմաներեն, արաբերեն, չինարեն։ «Հեյդար Ալիեւ» հիմնադրամի աջակցությամբ անցկացվող « Ադրբեջանը Փարիզի սրտում» նախագծի շրջանակներում, որ սեպտեմբերի 3- ին Ֆրանսիայի մայրաքաղաքում մեկնարկել է լուսանկարիչ Ռեզա Դեղատիի Ադրբեջանի հանդուրժողականության մասին «վկայող» ցուցահանդեսով,կոնֆերանսով, համերգով, ելույթ են ունեցել նաեւ ֆրանսիացի քաղաքական գործիչներ։ Ինչպես ներկայացնում է նույն աղբյուրը, ֆրանսիացի քաղաքական գործիչ Պիեռ Կոնեսան (Pierre Conesa) շեշտել է, թե հանդուրժողականության թեման Ֆրանսիայում արդիական է մնում եւ օրինակելի է նկատել Ադրբեջանիՙ այս ուղղությամբ ցուցաբերած միջոցառումները։ Նա ընդգծել է, թե կոնֆերանսը լավ հարթակ է արդիական հարցեր քննարկելու համար եւ իրազեկել, թե մասնակցում են Ֆրանսիայի եւ Ադրբեջանի կրոնական առաջնորդներ, կազմակերպությունների ղեկավարներ։Փարիզի առաջին թաղամասի ղեկավար Ժան Ֆրանսուա Լեգարեն (Jean-Francois Legaret) իր ելույթում դրվատել է Ադրբեջանիՙ հանդուրժողականության թեմայի հանդեպ հետաքրքրությունը եւ նշել, որ այն կարող է օրինակ հանդիսանալ այլ երկրների համար։ «Ադրբեջանը պատմականորեն խաչմերուկ է հանդիսացել մշակույթների, քաղաքակրթությունների։Այս գործոնը մշակութային բազմաշերտության մեջ կարեւոր դերակատարում է ունեցել», իր հերթին ասել է Մեհրիբան Ալիեւանՙ շեշտելով, թե իր երկրում մզկիթների, սինագոգների, ուղղափառ, կաթոլիկ եկեղեցիների ներկայությունը թելադրում է կառավարությանը վերանորոգել, պահպանել դրանք։ Ադրբեջանի առաջին տիկինը, որ միաժամանակ « Հեյդար Ալիեւ» հիմնադրամի նախագահն է, չի մոռացել ներկաներին իրազեկել Լեռնային Ղարաբաղի հակամարտության, «20 տոկոս գրավյալ տարածքների, 1 միլիոնից ավելի փախստականների, Խոջալուում մի գիշերում 613 սպանվածների մասին»։
Հայկական խոշոր սփյուռք ունեցող Ֆրանսիայի մայրաքաղաքում քաղաքական ցինիզմի այս վառ օրինակին համարժեք բողոք-պատասխանը կլինի Նոր Ջուղայի ավեր դարձած խաչքարերի ցուցահանդեսը, թեկուզՙ բացօթյա։
