Աշխարհում սովի ու թերասնման հաղթահարմանն ուղղված ջանքերը վերջին երկու տասնամյակների ընթացքում որոշակի արդյունք են տվել: Այդուհանդերձ, մոլորակի բնակչության 10 տոկոսը կամ 795 մլն մարդ դեռ տառապում է սովից: ՄԱԿ-ի Սննդի եւ գյուղատնտեսության կազմակերպության (FAO) 2015 թ. զեկույցի համաձայն, որը օրերս հրապարակվեց Հռոմում, վերջին տասնամյակում թերասնվող մարդկանց թիվը աշխարհում նվազել է 167 միլիոնով, իսկ 1990-1992 թթ. համեմատությամբՙ 216 միլիոնով: FAO-ի զեկույցը վկայակոչելովՙ ֆրանսիական «Լը Մոնդ» թերթը գրում է, որ, «չնայած ժողովրդագրական արագ աճին, աշխարհում թերասնվող ազգաբնակչության բաժինը 1990-1992 թթ. 18,6 տոկոսից 2014-2015 թթ. իջեցվել է 10,9 տոկոսի»: Թերասնման մասին խոսվում է այն բոլոր դեպքերում, երբ մարդկանց սնունդը անբավարար է ակտիվ եւ առողջ կյանք վարելու համար:
Թեեւ ընդհանուր առմամբ դրական տեղաշարժ է կատարվել, բայց FAO-ի հետազոտած 129 երկրներից 57-ը չի ապահովել հազարամյակի զարգացման թիվ մեկ նպատակը, այն էՙ կիսով չափ կրճատել աղքատության մակարդակը եւ սովյալների տոկոսը: 1990 թ. սահմանված Հազարամյակի խնդիրների կատարման առումով FAO-ն որոշ հաջողության է հասել մասնավորապես Արեւմտյան Աֆրիկայում, որտեղ թերասնվող մարդկանց թիվը քսանհինգ տարում նվազել է մոտ 25 տոկոսով: Կենտրոնական, Արեւելյան ու Հարավարեւելյան Ասիան եւ Լատինական Ամերիկան նույնպես հաջողություններ են արձանագրել: Մինչդեռ Սահարայից հարավ ընկած աֆրիկյան երկրներում եւ Հարավային Ասիայում իրավիճակը մնում է մտահոգիչ: Այդ երկու տարածաշրջաններում է ապրում սովից տառապող անձանց գերակշիռ մեծամասնությունը:
