Հունգարիայի պաշտպանության նախարարությունը , Հայաստանի գրավոր պահանջին ընդառաջ, որոշել է 2004-ին ՆԱՏՕ-ի դասընթացների ժամանակ ադրբեջանցի Ռամիլ Սաֆարովի կացնի հարվածներին զոհ գնացած լեյտենանտ Գուրգեն Մարգարյանի պատվին հուշատախտակ տեղադրել: Բուդապեշտը պիտի հուշատախտակ տեղադրի կացնահարված հայ սպա Գուրգեն Մարգարյանի պատվին, օգոստոսի 21-ին փոխանցում է Հունգարիայում եւ նրա գերմանախոս դրացի երկրների շրջանում 1853-ից հայտնի Pester Lloyd գերմանալեզու անկախ լրատունՙ «շինծու, կեղծավոր ափսոսանք» վերնագրելով արարքը:
Հունգարական Pester Lloyd-ը հիշեցնում է եղելության պատմությունը. թեեւ բուդապեշտյան դատարանը Սաֆարովի համար որպես նվազագույն պատժաժամկետ էր սահմանել 30 տարվա բանտարկությունը, բայց 2012-ին նրան հանձնեց Ադրբեջանին, ուր հանցագործին ոչ միայն ազատ արձակեցին, այլեւ նախագահ Ալիեւը նրան դիմավորեց որպես հերոսի: Հայաստանը խզեց դիվանագիտական հարաբերությունները Հունգարիայի հետ: Որոշ ժամանակ անց վարչապետ Օրբանը իրազեկեց, թե իր անձնական հանձնարարականով են Սաֆարովին արտահանձնել Ադրբեջանին:
Օրբանի կաբինետում ժամանակին արդարադատության նախարարի պաշտոնը ստանձնած, այսօրՙ կրթության, մշակույթի, սպորտի, երիտասարդության հարցերով ԵՄ հանձնակատար Թիբոր Նավրաչիչը ( Navracsics) Հունգարիայի վարքագիծը միջազգային ընդունված համաձայնությունների համատեքստում էր նկատում, բայց աշխարհի համար էլ ակնհայտ էր, որ իրականում գործարք էր կայացել: Կասկածի նշույլը փարատվեց, երբ մանավանդ Ադրբեջանը ազատ արձակեց մարդասպանին: Հունգարիային գայթակղել էր ադրբեջանական էժան գազը, ինչպես նաեւ պետական պարտատոմսերի գնումը, որի շնորհիվ կուտակված պարտքերի խնդիրը կառավարելի դառնալու հեռանկար էր գծում: Դրանից հետո Ադրբեջանի հետ տնտեսական կապերը հետեւողականորեն ընդլայնվում են, Բաքվում այսպես կոչված Առեւտրի պալատ է բացվում, 2013 թվականին հունգարական փոստը նույնիսկ բռնապետ Հեյդար Ալիեւի պատկերով նամականիշ է թողարկում:
Ըստ Pester Lloyd-ի, հայաստանյան կողմը պահանջել է, որ հուշատախտակ փակցվի հենց բռնարարքի վայրում, որը Բուդապեշտի երբեմնի ռազմական ակադեմիայի շենքն է եւ այժմ քաղծառայությունների համալսարանին է սպասարկում: Հունգարիայի պաշտպանության նախարարությունը մտադրություն ունի հուշատախտակի տեղադրումն այլ վայրում իրականացնել, հայկական կողմը հաղորդել է, թե իր համաձայնությունը կտա այն ժամանակ, երբ տեղավայրի, ինչպես նաեւ հուշատախտակի վերաբերյալ բավարար տեղեկատվություն իրեն տրամադրվի:
Հունգար ընդդիմադիր քաղաքական գործիչները հուշատախտակի տեղադրման վերաբերյալ տարաձայնությունները «ցինիկ շողոքորթություն» են որակել:
Գերմանիա
