անրապետական վարչություն, Երեւան, 24 հունիսի 2015 թ.
ՌԱԿ Հանրապետական վարչությունը անհանգստացած է հանրապետությունում եւ մասնավորապես Բաղրամյան փողոցում եւ շուրջը ստեղծված իրավիճակից եւ կոչ է անում առկա խնդիրների լուծման համար սկսել ակտիվ բանակցություններ:
Միաժամանակ ՌԱԿ Հանրապետական վարչությունը ընդգծում է, որ ստեղծված իրավիճակը կուտակված ներքաղաքական եւ ներտնտեսական պատճառներով չլուծված խնդիրների հետեւանք է:
Հանրապետական վարչությունը դեռ մեկ տարի առաջ էլեկտրաէներգիայի գների կտրուկ բարձրացումը գնահատել է չհիմնավորված եւ համապատասխան մարմինների գործունեությունըՙ ոչ թափանցիկ, որի արդյունքն է այսօրվա իրական պատկերը:
Առկա իրավիճակին լուծում գտնելու համար ՀՀ իշխանությունները պետք է քայլեր ձեռնարկեն պետական ինստիտուտների եւ հատկապես օրինապահ մարմինների նկատմամբ վստահության մթնոլորտի ստեղծման նպատակով, ստեղծեն առկա խնդիրների լուծման համար ժողովրդի հետ երկխոսության մեխանիզմներ, ընդհուպ վերականգնել ժողովրդի վստահությունը ընտրական համակարգի նկատմամբ:
Ելնելով ստեղծված իրավիճակից եւ հաշվի առնելով անվտանգության խնդիրները եւ հատկապես Արցախի շուրջը հնարավոր անբարենպաստ զարգացումները, կոչ ենք անում զերծ մնալ ուժային պայքարի բոլոր ձեւերից եւ ազգաբնակչության բարեկեցության համար ձեռնարկել հստակ քայլեր:
