Հայոց ցեղասպանության հարյուրամյա տարելիցի առթիվ Քեմբրիջում (Միացյալ թագավորություն) «Ջեյնըս» («Յանուս») հրատարակչատունը (Janus Publishing Company) լույս է ընծայել անգլերեն լեզվով Սերժ Մոմճյանի «Կոմիտաս: Արվեստագետն ու նահատակը» (Komitas, The Artist and The Martyr) հատորը, տեղեկացնում է այդ առթիվ խմբագրությանը հասցեագրված մամլո հաղորդագրությունը:
222 էջ պարունակող գիրքը պատմում է հայ խոշորագույն երաժիշտ-բանահավաք, երաժշտագետ, խմբավար, մանկավարժ եւ հայկական ազգային կոմպոզիտորական դպրոցի հիմնադիր անմահն Կոմիտասի մեծ վաստակի, փայլուն հաղթանակների, բայց նաեւ ողբերգական վախճանի մասին:
Հեղինակըՙ Սերժ Մոմճյանը մասնագիտությամբ լրագրող է: Հետեւել է նաեւ գեղարվեստական վեպեր գրելու հատուկ դասընթացների: Աշխատակցել է Բեյրութում լույս տեսնող «Դեյլի Սթար» (Daily Star) թերթին եւ լոնդոնյան «Իվենտս» (Events) լրատվական ամսագրին: Վեպեր սկսել է գրել 40 տարեկանից: Հեղինակ է «Անտեսանելի գիծը», «Հակասական դրդապատճառներ», «Օպերայի երգիչը» եւ «Անցյալի հիշողություններ» հատորները, որոնք հրատարակվել են Մեծ Բրիտանիայում:
