Հյուսիս Հռենոս Վեստֆալյան երկրամասի Զիիգենի քաղխորհրդի Քրիստոնյա- դեմոկրատական միության խմբակցության 34 անդամների թիվը մեկով նվազել է, քանի որ Քրիստիան Յոհաննես Հենրիհը (Christian Johannes Henrich) լքել է շարքերըՙ կուսակցությանՙ «Հայկական հարցի» առնչությամբ որդեգրած դիրքորոշման պատճառով: «Տարօրինակ հիմնավորում», նկատել է խմբակցության ղեկավար Ռյուդիգեր Հոյփելը : Ինչպես առցանց «դերվեսթեն» լրատուն է իրազեկում, մայիսի 19-ին, 21 տարի ՔԴՄիությանը անդամակցած Քրիստիան Յոհաննես Հենրիհը, որ մաս էր կազմում կրթության հանձնաժողովի, ներգաղթյալների խորհրդի աշխատանքներին, իր հրաժարականը պատճառաբանում է այն հիմնավորմամբ, որ Բունդեսթագի ապրիլի 24-ի նիստին նաեւ իր կուսակից ընկերներն են «ցեղասպանություն» եզրաբառը կիրառելՙ 1915-ին հայոց դեմ Օսմանյան կայսրության գործած ոճիրը ձեւակերպելիս, իսկ ինքը համակարծիք չէ կուսակցության այդ դիրքորոշմանը: Որպես անկուսակցականՙ Հենրիհը ցանկություն ունի շարունակել աշխատանքը, բայց խմբակցության վարչությունը մերժել է նրա պատրաստակամությունը: Նրա հրաժարականը չի տկարացնում քաղխորհրդում ՔԴՄ կուսակցության դիրքերը, այն շարունակում է առաջատար մնալ:
Դոկտոր Քրիստիան Յոհաննես Հենրիհը քաղաքագետ է, իր դոկտորական թեզում եւ բազմաթիվ հրատարակություններում նա Հայոց հարցի առնչությամբ միշտ դեմ է արտահայտվել ցեղասպանություն բնորոշմանըՙ նկատելով, թե «հայ պատմաբանների ու քաղաքագետների պատմական իրադարձությունների վերաբերյալ միակողմանի շարադրանքն իր դրոշմն է դրել հակամարտության միջազգային ընկալման վրա»: Նա միակողմանի է որակել քաղաքագետների, ԶԼՄ-ի կարծիքը Հայոց ցեղասպանության վերաբերյալՙ «Կարելի է երկու ցեղասպանությունների մասին խոսել կամ լավագույն դեպքում այսպես ձեւակերպելՙ քաղաքացիական պատերազմի իրադրությամբ պայմանավորվածՙ երկու կողմում էլ զանգվածային սպանդ ու մարդու իրավունքների խախտում է եղել»:
Մայիսի 28-ին Զիիգենի Բիսմարկհալլեում թուրքական տարբեր կազմակերպություններ նախաձեռնել են«1915-ի առաջին համաշխարհային պատերազմի ժամանակ հայերի եւ թուրքերի ցավագին պատմությունը» վերնագրյալ միջոցառումը, որի հիմնական բանախոսը Քրիստիան Յոհաննես Հենրիհն է:
Թուրքերը մայիսի 28-ը նպատակայի՞ն են ընտրել, թե՞ ոչ, այնքան էլ կարեւոր չէ, ուշագրավն այն է, որ առաջիկա այս միջոցառումը պատասխան է Զիիգենի ժողովրդական բարձրագույն դպրոցում կազմակերպված «Հայոց ցեղասպանության 100- ամյա տարելիցին» նվիրված միջոցառումների շարքին: Մեր ներկայացրած գերմանական լրատվական աղբյուրըՙ առցանց «դերվեսթեն» նշում է, թե 100-ամյա տարելիցի առիթով կազմակերպված հիշատակի միջոցառումների դեմ թուրքական միություններն իրենց դժկամությունն էին հայտնել: Երբ տեսել են, որ իրենց ջանքերն անպտուղ են,մտածել են օգնություն խնդրել բարեկամ գերմանացի քաղաքագետից: Ենթադրություններ չանենք, թե հարազատ կուսակցության շարքերը լքած Քրիստիան Յոհաննես Հենրիհի փաստարկները լավ տեղավորվում են Թուրքիայի ընտրարշավային բառապաշարում, ու միգուցե նրա բազմամյա կուսակցական փորձառությունն Էրդողանն ու նրա համակիրները իսկապես հաշվի առնեն առաջիկայում ու նրան հրավիրեն ղեկավարել քարոզչական կամ կուսակցական որեւէ լուրջ կառույց: Բոլոր պարագաներում ստորեւ ներկայացվող կենսագրական համառոտ քաղվածքը կարծես դա է ակնարկում:
Քրիստիան Յոհաննես Հենրիհը դասավանդում է Զիիգենի համալսարանում, ներկայացնում է Հարավարեւելյան Եվրոպա եւ Կովկաս գիտահետազոտական կենտրոնը (Զիիգեն): Նա Հեսսենի երկրամասում թուրքական համայնքի գիտական խորհրդատուն է, Անկարայի համալսարանից 2013-ին ստացած վկայականը հուշում է, թե անգլերենին, սլովակերենին, լատիներենին զուգահեռ տիրապետում է նաեւ թուրքերենին: Նրա կենսագրականը ծանուցում է, թե քաղաքագիտական ուսումնասիրությունների էլեկտրոնային թերթի խմբագիր է: Կենսագրականում նշված է, թե գիտական առանձնահատուկ հետաքրքրություն է տածում Կովկասիՙ Թուրքիայի, Հայաստանի, Ադրբեջանի հանդեպ, բայց ուշագրավ է, որ նրա կարդացած դասախոսությունները լսարան են գտել առավել շատ Թուրքիայում, Ադրբեջանում, քան Գերմանիայում ու այլ երկրներում:
Գերմանիա
