Աբովյանի քաղաքապետի առաջիկա ընտրություններում մի ուշագրավ իրավիճակ է ստեղծվել. թեկնածուների ցուցակում երկու Արթուր Հովհաննիսյան կա, ավելինՙ երկուսի հայրանունն էլ Գեղամ է:
Այս կապակցությամբ մի խորհուրդ ունենք Աբովյանի քաղաքապետի թեկնածու Արթուր Գեղամի Հարությունյաններից` առավել հայտնիին… Առաջարկում ենք ընտրաթերթիկներում իր անվան դիմաց, փակագծում նշել մականունը` Պալաչ, որպեսզի ընտրողները միանգամից հասկանան, տվյալ պարագայում` տեղը բերեն, թե խոսքը ո՞ր Արթուրի մասին է: Նկատենք, որ ԿԸՀ-ից նշել են, որ օրենքը նման պարագայում, երբ թեկնածուներից երկուսի անունը, ազգանունը, անգամ հայրանունը համընկնում է, որպես կարգավորող մեխանիզմ առաջարկում է թեկնածուների անունների դիմաց գրել նաեւ վերջիններիս ծննդյան թիվը: Բայց քաղաքապետի թեկնածուները հո հայ գրականության մեծեր չե՞ն, որ ժողովուրդը պարտավոր լինի իմանալ-հիշել նրանց ծննդյան տարեդարձներն ու ամյակները:
Հետեւաբար, նույն ԿԸՀ-ից հորդորում են, որպեսզի թեկնածուները աշխատանք տանեն իրենց ընտրողների հետ, որպեսզի վերջիններիս իրազեկեն, թե կոնկրետ պարագայում` երկու Արթուր Գեղամիչներից ո՞ր մեկն են իրենք: Դե մենք էլ Արթուրներից այն մեկին առաջարկում ենք… արդեն ասացինք, թե ինչ:
Բացի ընտրողների շրջանում միանգամից բացահայտվելուց, Պալաչ մականունի նշմարումը ընտրաթերթիկներում հիմք կհանդիսա նա մի ազնիվ երեւույթի: Մեր այլ, անգամ համապետական նշանակության ընտրություններում թեկնածուները, եթե անգամ իրենց անունները չեն համընկնում, ընտրաթերթիկներում կարող են նշել նաեւ իրենց մականունները. մի բանի գոնե դրանք պետք կգան, բացի այդ, թեկնածուներից շատերին, օրինակ նույն` Արթուր Հովհաննիսյանին, ժողովուրդը ավելի ճանաչում է մականունով, քան իսկական անունով: Հետեւաբար Արթուր Հովհաննիսյաններից Պալաչը ընտրաթերթիկում կարող է անգամ իր իսկական անունը չգրել, այլ ուղղակի` Պալաչ:
Հա, մի խորհուրդ էլ. լավ կլինի, որ մականունի թարգմանությունը չներկայացվի. մարդ ես, կարող է ռուսերեն լավ իմացողներ չկան ու մարդիկ չգիտեն, թե ինչ է նշանակում ռուսերենից թարգմանաբար` Պալաչը: Հ. ԱՖՅԱՆ
