Պատասխան քայլը` ՄԱԿ-ինն է:
Մայիսի 8-ին Մոսկվայում Համաշխարհային հայկական կոնգրեսի եւ Ռուսաստանի հայերի միության նախագահ, ՅՈւՆԵՍԿՕ-ի Բարի կամքի դեսպան Արա Աբրահամյանը հանդիսավոր ճաշ էր կազմակերպել նույն օրը ՌԴ մայրաքաղաքում գտնվող ՄԱԿ-ի Կրթության, գիտության եւ մշակույթի հարցերով կազմակերպության (ՅՈւՆԵՍԿՕ-ի) գլխավոր տնօրեն Իրինա Բոկովայի պատվին: Միջոցառման ընթացքում Արա Աբրահամյանը տիկին Բոկովային է հանձնել «Հայոց Անին վտանգված է: Ահազանգ» միջնորդագիրը:
Հիշեցնենք, որ Համաշխարհային հայկական կոնգրեսը եւ Ռուսաստանի հայերի միությունը` «Հայ ասպետ» կրթադաստիարակչական հիմնադրամի հետ համատեղ ավելի վաղ նախաձեռնել էին էլեկտրոնային առցանց ստորագրահավաք «Հայոց Անին վտանգված է: Ահազանգ» միջնորդագրի ներքո, որով կոչ էր արվում Հայոց ցեղասպանության 100-րդ տարելիցին ընդառաջ, միջազգային հանրության եւ ՅՈւՆԵՍԿՕ-ի աջակցությամբ հասնել նրան, որ Անիի մշակութային կոթողների վերանորոգումը կատարվի հայ մասնագետների կողմից կամ նրանց որոշիչ մասնակցությամբ:
Աշխարհի 60 երկրներից ավելի քան 10 հազար հոգի մասնակցեցին այս ստորագրահավաքին, որի արդյունքում էլ նախապատրաստվեց գունազարդ գրքի տեսքով փաստաթղթային փաթեթ, ինչն էլ ներառում է նախաձեռնող կազմակերպությունների միջնորդագիրը` երեք լեզուներով: Գիրք-միջնորդագրում ներառվեցին նաեւ Անիի հուշարձանների պատկերները, ինչպես նաեւ առկա բոլոր առցանց ստորագրությունները` իրենց էլեկտրոնային հասցեներով եւ երկրներով:
Հայտարարվեց, որ միջնորդագիրը կհանձնվի ՅՈւՆԵՍԿՕ-ի ղեկավարությանը:
Մայիսի 8-ին հանձնման պաշտոնական արարողությանը մասնակցել են նաեւ ՌԴ-ում Հայաստանի դեսպան Օլեգ Եսայանը, Ռուսաստանում ՅՈւՆԵՍԿՕ-ի դեսպան Էլեոնորա Միտրոֆանովան, ՌԴ ԱԳ նախարարության պաշտոնական ներկայացուցիչ Գրիգորի Օրջոնոկիձեն, այլք:
