ՍԵԼԱՎՆԵՐԻ ՋՐՈՎ ԱՆՀԱՏՈՒՅՑ ԿՈՌՈԳՎԵՆ 80 ՀԱԶԱՐ ՀԱ ՀՈՂԱՏԱՐԱԾՈՒԹՅՈՒՆՆԵՐ
2015թ. գարնանը ջրօգտագործողներին ոռոգման ջուր մատակարարելու հարցը քննարկելով, կառավարությունը երեկ որոշեց գետերի ավազանների սելավների հետեւանքնով վարարող ջրերը գյուղացիներին մատակարարել անվճար: Խոսքը 80 հազար հա հողատարածություններին ոռոգման ջուրը անահտույց մատակարարելու մասին է: Ինչպես նշեց վարչապետ Հովիկ Աբրահամյանը, որոշվել է մայիս ամսվա ընթացքում գետերի վարարման հետեւանքով հեղեղումը կանխելու նպատակով «Սեւան-Հրազդանյան-ջրառ» եւ «Ախուրյան-Արաքս-ջրառ» ՓԲԸ-ներին թույլատրել ջուրը մատակարարել առանց հասույթ ձեւավորելու, ինչը կարեւոր աջակցություն է հողօգտագործողներին:
Դրոշմապիտակավորման օրենքի կիրառումը հետաձգվեց մինչեւ հունիսի 1-ը
«Առեւտրի եւ ծառայությունների մասին» օրենքով մայիսի 1-ից դրոշմապիտակով պետք է պիտակավորվեն վիտամինը, պատվաստանյութը, դեղը, օծանելիքը եւ այլ ապրանքներ: Սակայն կառավարության երեկվա նիստում որոշվեց ՓՄՁ-ներին հնարավորություն տալ մինչեւ հունիսի 1-ը իրացնելու առանց դրոշմապիտակի ապրանքներըՙ մինչեւ ֆինանսների նախարարությունը նոր կարգ սահմանի:
Պրոբացիոն ծառայությունը կներդրվի քայլ առ քայլ
«Հայաստանի Հանրապետությունում պրոբացիոն ծառայության ներդրման հայեցակարգը երեկ հավանության արժանացավ կառավարության կողմից: Պրոբացիայի կիրառումը ենթադրում է ազատազրկման ավանդական գաղափարախոսությունից անցում դեպի վերականգնողական արդարադատության գաղափարախոսություն, որի էությունը ազատազրկման այլընտրանքային միջոցներով պատժի նպատակներին հասնելն է: Ըստ հայեցակարգի, այդպիսի ծառայություն է ստեղծվելու արդարադատության նախարարության կազմում: Հարցի շուրջ կառավարությունում ծավալված քննարկման ժամանակ այն կարծիքը հայտնվեց, որ պրոբացիայի սկզբունքները պետք է ներդնել ժամանակի ընթացքում եւ քայլ առ քայլ: Վարչապետ Հովիկ Աբրահամյանը նշելով պրոբացիոն ծառայության կարեւորությունը, ընդգծեց, որ դա հիմք չի տալիս շտապելու եւ սխալ թույլ տալու համար: «Պետք է ուսումնասիրենք աշխարհի փորձը եւ այն տեղայնացնենք Հայաստանի Հանրապետությունում», նշեց նա:
