ԱՎՍՏՐԻԱՅԻ ԽՈՐՀՐԴԱՐԱՆԸ ՃԱՆԱՉԵՑ ՈՒ ԴԱՏԱՊԱՐՏԵՑ ՀԱՅՈՑ ՑԵՂԱՍՊԱՆՈՒԹՅՈՒՆԸ

Անահիտ Հովսեփյան, Գերմանիա

Այսօր 1 րոպե լռությամբ Ավստրիայի խորհրդարանի պատգամավորները հարգեցին Հայոց ցեղասպանության զոհերի հիշատակը եւ ընդունեցին Ազգային Խորհրդի 6 խմբակցություններիՙ Հայոց ցեղասպանության ճանաչման եւ դատապարտման միացյալ բանաձեւը։ “Ինչպես է Վիեննան ճանաչում եւ դատապարտում Հայոց ցեղասպանությունը” վերնագրյալ հոդվածում “Դի փրեսսեն” ապրիլի 22-ի համարում ծանուցում է, որ այն արձագանքներ կգտնի Թուրքիայում։ Մյուս կողմից, ըստ նույն աղբյուրի, արտգործնախարարությունը Թուրքիայի հետ հարաբերությունները նկատի առնելով, վերապահ է մնում։ Ըստ ավստրիական աղբյուրի, “Ելնելով պատմական պատասխանատվությունից Ավստրո հունգարական միապետությունը առաջին համաշխարհային պատերազմի ժամանակ Օսմանյան կայսրության դաշնակիցն էր եւ մեր պարտքն է սարսափելի իրադարձությունները որպես ցեղասպանություն (Genozid) ճանաչել եւ դատարպարտել”, հայտարարության տեքստից, հատված է ներկայացնում “Դի փրեսսեն”։ “Սա չպետք է նկատել որպես Թուրքիայի դեմ սադրանք, թերթին փոխանցել է բանաձեւի հեղինակներից Ռայնհոլդ Լոպատկան, այլՙ Թուրքիայի եւ Հայաստանի միջեւ երկխոսության խթան”։