Հայաստանի կոնյակի արտադրության հնագույն եւ առաջատար ձեռնարկությունը` Երեւանի կոնյակի գործարանն (ԵԿԳ) այս տարվա ապրիլին վերաթողարկեց հայկական կոնյակագործության լեգենդներից մեկի` Սեդրակ Մարգարյանի հանրահայտ «Հայաստան» կոնյակը: Ապրիլի 14-ին տեղի ունեցած միջոցառմանը հրավիրված լրատվամիջոցների ներկայացուցիչներին ներկայացվեցին այս կոնյակի յուրահատուկ համային հատկությունները, Մարգար Սեդրակյանի կյանքը եւ գործունեությունը, Երեւանի կոնյակի գործարանի անցած պատմական ուղին, հարուստ ժառանգությունը, անցյալն ու ներկան: Այս ամենը իրականացվեց կոնյակի բույրով հագեցած հնեցման արտադրամաս-հայկական կոնյակագործության թանգարան-համտեսի սրահ յուրօրինակ ճամփորդության ժամանակ, որը ներկաների առջեւ բացեց հայկական կոնյակի` 1887 թ.-ից սկիզբ առաջ պատմությունը, ձեռքբերումներն ու նվաճումները, ԱՐԱՐԱՏ կոնյակների տարբեր տեսակների ստեղծման մանրամասները, նրանց պատրաստման եղանակը, կոնյակ խմելու մշակույթն ու առանձնահատկությունները:
Խոսելով միջոցառման գլխավոր «մեղավորի»ՙ Մարգար Սեդրակյանի «Հայաստան» կոնյակի մասին, 1999-ից ալկոհոլային խմիչքների համաշխարհային առաջատար «Պեռնո Ռիկար» միջազգային խմբի անդամ դարձած Երեւանի կոնյակի գործարանի մասնագետները պատմեցին, որ 10 տարի հնեցմամբ «Հայաստան» կոնյակը ստեղծվել է հեռավոր 1940 թվականին: Ներկայումս վերածնված «Հայաստան» կոնյակը ներկայանում է ԱՐԱՐԱՏ տեսականու ներկայիս շշերին եւ արտաքին տեսքին ոչ բնորոշ ձեւավորմամբ` նմանեցված տասնամյակներ առաջ գոյություն ունեցած արտաքին ձեւավորմանը: Նպատակն է արթնացնելու երբեմնի հայտնի «Հայաստան» կոնյակի նկատմամբ ջերմ հուշերը: Այն ներկայացված է ԱՐԱՐԱՏ կոնյակների կոլեկցիոն տեսականու ներքո: Բացի կաղնու փայտից պատրաստված տակառներում անցած 10 տարվա հետկուպաժային հնեցման շրջանի, վերաստեղծված «Հայաստանը» ենթադրում է նաեւ հետկուպաժային երեք եւ ավելի տարիների հնեցում:
Մի խոսքով, հայկական կոնյակների բոլոր սիրահարներին մնում է վայելել Երեւանի կոնյակի գործարանի հին ու նոր գլուխգործոցը` «Հայաստան» կոնյակը:
