Ավստրիական ռադիոյիՙ oe 1-ի ապրիլի 18 -24-ի եթերում
Ավստրիական orf-ը «100-ամյա տաբու. Հայոց ցեղասպանությունը » վերնագրով հաղորդում է հեռարձակել մարտի 20-ին ժամը 22.45-ին orf 2-ով: Ավստրիական վավերագրությունը ներկայացրել է Թուրքիայում ցեղասպանության տաբուն կոտրած, հիշողությունն արթնացնելու պայքարը սկսած երկու անձանցՙ զոհի թոռներից մեկինՙ Ֆեթիյե Չեթինին եւ ցեղասպանությունն իրագործողի թոռանըՙ Հասան Ջեմալին: «Քիչ են 20-րդ դարի այն ոճիրները, որոնց առերեսումը հանրային հետաքրքրություն ու քաղաքական կշիռ ունի, եւ 100 տարի անց էլ բեւեռացնում է: Ի հեճուկս աշխարհում շատ երկրների ճանաչմանՙ պաշտոնական Թուրքիան մինչ օրս էլ ժխտում է Հայոց ցեղասպանությունը», հաղորդում է ավստրիական լրատունՙ փոխանցելով, թե նույն թեմայի վերաբերյալ իրՙ «Լռեցված ցեղասպանություն» խորագրով ռադիոշարքը կարելի է ունկնդրել oe 1-ովՙ ապրիլի 18-ից 24-ը: Ապրիլի 18-ին ժամը 9.05-ին սկսվող հաղորդումների շարքն անդրադառնալու է հայոց ինքնությանն ու մշակույթին, Վիեննայի հայ համայնքին, Մխիթարյան միաբանությանը, մանկաբույժ Ներսես Առաքելյանին, ինչպես նաեւ արծարծելու է մեղք, պատասխանատվություն հասկացություններըՙ Հայոց ցեղասպանության առնչությամբ:
Ապրիլի19 -ին ժամը 19.30-ին հնչելու են Կոմիտասի եւ Տիգրան Մանսուրյանի ստեղծագործություններըՙ Գրացի մեծ նվագախմբի կատարմամբ: Ապրիլի 20 -ին ժամը 16-ին «Հայերի երախտիքի տուրքը Ֆրանց Վերֆելին» հաղորդումը ներկայացնելու է 2013-ի նոյեմբերի 26-ին Վիեննայում ՀՀ դեսպանության, Հայոց ցեղասպանության թանգարան-ինստիտուտի եւ ավստրիահայոց Հայ առաքելական եկեղեցու համատեղ միջոցառման ձայնագրությունը:
Դանիել Գութմանի «Մեղքՙ առանց ապաշխարման» քառամաս հաղորդումը (ապրիլի 20-ին, 21-ին, 22-ին, 23-ինՙ ժամը 9.30-ին) հանգամանալից ներկայացնում է Գերմանիայի, Ավստրոհունգարիայի դերն առաջին համաշխարհային պատերազմում. Հայոց ցեղասպանության մեջ ակնհայտ մեղսակցություն ունենալով, ի հեճուկս իրենց ունեցած համապատասխանատվության, Ավստրիան ու Գերմանիան ճնշում չեն բանեցնում Թուրքիայի վրա, որ վերջինս փոխի իր ժխտող դիրքորոշումը, հայտնում է Գութմանը:
«Ցեղասպանության դերն այսօրվա ինքնության գիտակցության մեջ» թեմայով զրույցը կարելի է ունկնդրել ապրիլի 23-ին, ժամը 21-ին եւ ապրիլի 24-ին, ժամը 16-ին: Հյուրը 1990-ին Հայաստանում ծնված Անահիտ Բալայանն է, որ մշակույթի եւ կրոնի վերաբերյալ իր գիտական թեզի վրա է աշխատում Բեռլինի Հումբոլտ համալսարանում:
Ապրիլի 24-ին, ժամը 6.56-ին ավստրիական ռադիոեթերում աստվածաբան, հրապարակախոս Բրիգիտտե Շվենս-Հարրանտը կանդրադառնա պատմված հիշողությանըՙ գրականությանը: Ֆրանց Վերֆելի գրավոր հուշարձանը միակը չմնաց, Հիլզենրաթը, Անտոնիա Արսլանը, Վարուժան Ոսկանյանը փոխանցում են իրենց պատմությունը:
Ապրիլի 24-ին oe 1-ի ռադիոեթերը Հայոց ցեղասպանության թեմային կանդրադառնա ողջ օրը այլՙ լրատվական-տեղեկատվական, մշակութային ծրագրային հաղորդումներում:
