Վերջին տեղեկությունների համաձայն, Չինաստանը Գերմանիային դուրս է մղել զենք արտահանող երկրների առաջին եռյակից եւ այժմ ինքն է զբաղեցնում 3-րդ տեղը: Այդ մասին հաղորդում է «Ֆիգարո» թերթը, վկայակոչելով Ստոկհոլմում գործող Խաղաղության հետազոտման միջազգային ինստիտուտի (SIPRI) տվյալները:
Մարտի 16-ին SIPRI-ի հրապարակած զեկույցի համաձայն, աշխարհի երկրորդ տնտեսությունը հանդիսացող Չինաստանը 2010-2014 թվականներին սպառազինության արտահանման ծավալը 143 տոկոսով ավելացրել է նախորդ հինգ տարիների համեմատությամբ, երբ ինքը այդ ցուցանիշով զբաղեցնում էր աշխարհում 9-րդ տեղը:
«Ասիական երկրները շարունակում են ավելացնել իրենց ռազմական զորությունըՙ շեշտը դնելով ռազմածովային ակտիվների վրա», պարզաբանում է SIPRI-ի գիտաշխատող Սիեմոն Վեզեմանը մի հաղորդագրության մեջ: Չինական զենքի արտահանումների ավելի քան 2/3-ը նախատեսված է Պակիստանի, Բանգլադեշի եւ Բիրմայի համար: Պեկինը զենք է վաճառել նաեւ աֆրիկյան 18 երկրների:
ՉԺՀ արտգործնախարարության խոսնակը մամլո ասուլիսում հայտարարել է, որ իր երկիրը «չափազանց զգուշավոր եւ խոհեմ է» սպառազինության արտահանումների հարցում: Պեկինը տվյալ ոլորտի հետ կապված թվական տվյալներ չի հրապարակում:
