Քրիստոնյաների ներկա վիճակը
Բրիտանական հատուկ ծառայությունները բացահայտել են այսպես կոչված «Ջիհադիստ Ջոնի» իսկական անունը։ Այդ բրիտանացին տեսախցիկների առջեւ հաշվեհարդար է տեսնում «Իսլամական պետություն» խմբավորման գերիների նկատմամբ։ Իսլամիստ դահիճը Լոնդոնի 27-ամյա բնակիչ Մոհամմեդ Էմվազին է։ Հատուկ ծառայությունների համար նա մնում է անորսալի եւ հավանաբար նախապատրաստում է նոր զանգվածային սպանություններ։
«Ջիհադիստ Ջոնն» ապրել է Լոնդոնի արեւմուտքումՙ Քվինզ պարկ շրջանի տներից մեկում։ Այդ ահաբեկիչը ծնվել է Քուվեյթում, Մեծ Բրիտանիայի քաղաքացի է։ Ապրել է բարեկեցիկ ընտանիքում, ծրագրավորողի մասնագիտություն ստացել Վեստմինսթերի համալսարանում։ Ջիհադիստի հարեւանները դժվարությամբ են հավատում, որ տեսագրության մեջ Սիրիայում մարդկանց սպանող գրոհայինը հենց նա է։
Ինչպես պարզվում է, նա արմատական իսլամի ազդեցության տակ ընկել է 2009 թվականին Տանզանիա մեկնելուց հետո։ Բրիտանացի ծայրահեղականը իր երկրի հատուկ ծառայությունների վերահսկողության տակ էր, բայց դա, ըստ երեւույթին, չխանգարեց, որ նա Լոնդոնից մեկնի Սիրիա եւ միանա իսլամիստներին, նշում է «Վեստի» գործակալությունը։
Հայտնի է, որ Եվրոպայում մնացող նրա ընկերները իր նման ծայրահեղականներ են, որոնք հավանաբար մտել են եվրոպացի գրոհայինների ընհատակյա բջիջների մեջ։ Վերջին տվյալների համաձայն, բրիտանացի մոտ 600 մահմեդականներ արդեն մեկնել են ծայրահեղականների ճամբարներ։ Փետրվարի վերջերին Իսպանիայում հայտնաբերվեց իսլամիստների հավաքագրման հերթական կենտրոնը։ Եվրոպական երկրների իշխանությունները ներկայումս ստիպված են սեփական տարածքներում պայքարել հենց Արեւմուտքի աջակցությամբ հզորացած սիրիական գրոհայինների դեմ։
Սիրիայի հյուսիս-արեւելքում իսլամիստներն ամայացնում են քրիստոնյա ասորիների գյուղերը, ավերում հնագույն եկեղեցիները, հրկիզում կամուրջներըՙ կտրելով մարդկանց նահանջի ճանապարհը։ Առեւանգված են հարյուրավոր քրիստոնյաներ։ Պատանդներին հավանաբար պահում են սիրիա-իրաքյան սահմանի մոտ գտնվող ճամբարում, ուր մեկ տարի առաջ տարել էին Իրաքում գերված եզդիներին։
Իրաքի Մոսուլ քաղաքում իսլամիստները օրերս ոչնչացրին Ասորեստանի եւ Պարթեւական թագավորության պատմության հնագույն եւ անկրկնելի հուշարձաններ։ «Իսլամական պետության» գրոհայինները, ոչնչացնելով իսլամին անհարիր ամեն ինչ եւ սպանելով իրենց օրենքներին չենթարկվող բոլոր անձանց, փաստորեն պատերազմ են հայտարարել ամբողջ քրիստոնյա աշխարհին։ Լիբիայում զանգվածաբար սպանում են եգիպտացի քրիստոնյա ղպտիներին։ Իրաքում 8 տարի առաջ ապրում էին մեկուկես միլիոն քրիստոնյաներ։ Այժմ մնացել է նրանց հազիվ 1/10-ը։ Մյուսները կամ սպանված են, կամ էլ փախել են երկրից։ Մոսուլ քաղաքում, հավանաբար, ոչ մի քրիստոնյա չի մնացել։ Սիրիայում նախքան պատերազմը կար 2 մլն քրիստոնյաՙ բնակչության գրեթե 10 տոկոսը։ Այժմ 1 միլիոնն անհետ կորած է։ Շատերը զոհվել են, ոմանք փախել են հակամարտության գոտուց։ Ավերված է հարյուցից ավելի եկեղեցի։ Այս ամենն արել են նույն գրոհայինները, որոնց դեռ վերջերս ընդդեմ նախագահ Ասադի աջակցում էին ԱՄՆ-ը եւ Եվրոպանՙ նրանց անվանելով նոր, ժողովրդավարական Սիրիայի մարտիկներ։
