Կառավարությունում երեկ հաստատված «Աջակցություն փոքր եւ միջին ձեռնարկատիրության սուբյեկտներին» 2015թ. ծրագրի համաձայն, ՓՄՁ-ների աջակցության միջոցառումների գերակշիռ մասըՙ շուրջ 90 տոկոսը, ուղղվելու է մարզերին, առավելապես սահմանամերձ եւ հեռավոր բնակավայրերին: Աջակցություն կցուցաբերվի սկսնակ եւ գործող փոքր եւ միջին ձեռնարկատերերին: Ակնկալվում է, որ կավելանա փոքր եւ միջին ձեռնարկությունների տեսակարար կշիռը երկրի համախառն ներքին արդյունքում, կզարգանա տնտեսական ցածր ակտիվություն ունեցող տարածաշրջանների ձեռնարկատիրական գործունեությունը, կկրճատվի գործազրկությունը:
Ինչպես նշեց հարցը ներկայացնող էկոնոմիկայի նախարար Կարեն Ճշմարիտյանը, այս ծրագրին կուղղվի 150 մլն դրամ: Նա նաեւ տեղեկացրեց, որ ՓՄՁ-ներին կտրամադրվի վարկային եւ ֆինանսական աջակցության երաշխավորություններ: Ըստ նախարարի, վարկային 12 տոկոս տոկոսադրույքի 3 տոկոսը պետությունը կսուբսիդավորի Արդյունաբերության զարգացման հիմնադրամի միջոցներից, եթե արտադրվող արտադրանքը արտահանման, պաշտպանության կամ ազգային անվտանգության կարիքների համար է:
Սփյուռքի 950 դպրոցների դասագրքերի ֆինանսավորումը Հայաստանից
Հայաստանի Հանրապետությունը կապահովի սփյուռքում գործող շուրջ 350 ամենօրյա (Խմբագրությունս չի կարող հավաստել այս թվի ստուգությունը- Ծ.Խ.) եւ շուրջ 600 մեկօրյա դպրոցների ուսումնական գրականության պահանջարկը: Այս մասին նշված է երեկ կառավարության հաստատած «Սփյուռքի հայկական կրթական հաստատությունների ուսումնական գրականության եւ օժանդակ նյութերի մշակում եւ տրամադրում» ծրագրում: Ինչպես տեղեկացրեց սփյուռքի նախարար Հրանուշ Հակոբյանը, յուրաքանչյուր տարի Հայաստանը բավարարում է սփյուռքի հայկական դպրոցների պահանջները:
25 մլն դոլարի մաքսային զննման սարքավորումներ Չինաստանից
ՀՀ ֆինանսների նախարարության եւ չինական «Նյուքթեք քամփնի» ՍՊԸ-ի միջեւ մաքսային զննման տեխնոլոգիաների եւ սարքավորումների արդիականացման կապակցությամբ մատակարարման պայմանագրի նախագիծը երեկ հավանության արժանացավ կառավարության կողմից: Պայմանագրի ընդհանուր արժեքը մոտ 25 մլն դոլար է:
Նախագիծը ներկայացնող ֆինանսների փոխնախարար Վախթանգ Միրումյանը տեղեկացրեց, որ հյուսիսային մաքսակետերի նորոգման եւ մաքսային հսկողության սարքավորումների ապամոնտաժման արդյունքում հրատապ անհրաժեշտություն է առաջացել ձեռք բերել մաքսային զննման շարժական ռենտգեն եւ այլ սարքավորումներ, որոնք կարող են կիրառվել նաեւ ապագայումՙ ըստ անհրաժեշտության տեղափոխման միջոցով:
