«Հարավային հոսք» համատեղ նախագծի փակումից հետո Եվրոմիությունը որոշել է պայմանագրեր կնքել գազի այլտընտրական մատակարարների հետ, որոնց թվում են Թուրքմենստանը, Ադրբեջանը եւ Ալժիրը: Այդ մասին տեղեկացնում է բրիտանական «Ֆայնենշլ թայմս» թերթը:
ԵՄ էներգետիկ անվտանգության նոր ռազմավարության նախագծում նշվում է, որ Եվրոմիությունը «արտաքին քաղաքականության բոլոր լծակները կօգտագործի ռազմավարական գործընկերություններ հաստատելու համար»:
ԵՄ իշխանությունները ռուսական գազի մատակարարումների հարցը սկսեցին վերանայել Ուկրաինայի հարավ-արեւելքում հակամարտության ծագումից հետո: «Կարծում եմՙ Եվրոպան հոգնել է ամեն ամառ գազի ձմեռային մատակարարումների կազմակերպման շուրջ բանակցելուց», բրիտանական թերթին ասել է Եվրոհանձնաժողովի էներգադաշինքի գծով փոխնախագահ Մարոշ Շեֆչովիչը: Նրա խոսքերով, Եվրոմիության համար Ռուսաստանը կմնա «շատ կարեւոր մատակարար», բայց նրա ազդեցությունը կնվազի: Շեֆչովիչն ավելացրել է, որ Եվրոմիությունը իր «քաղաքական ամբողջ կշիռը» կօգտագործի, որպեսզի Անդրադրիատիկյան գազամուղի կառուցման աշխատանքներն ավարտվեն մինչեւ 2019 թ. վերջը: Կազմակերպության ներկայացուցիչը մանրամասնել է, որ Մերձկասպյան շրջանից ու թերեւս Մերձավոր Արեւելքից եկող այդ գազատարով Եվրոպան 2020-ից սկսած տարեկան մինչեւ 10 մլրդ խմ գազ կստանա Ադրբեջանից: Բրյուսելը տվյալ գազամուղը ծրագրում է որպես «ընդհանուր շահերի նախագիծ», ինչը թույլ կտա խուսափել Եվրոմիության հակամենատիրական սահմանափակումներից: Եվրոպան նախատեսում է 2020 թ. հետո Անդրադրիատիկյան գազամուղի թողունակությունը հասցնել 20 մլրդ խորանարդ մետրի: Դրա համար անհրաժեշտ է համաձայնության հասնել Թուրքմենստանի հետ: Այս շաբաթ Շեֆչովիչը հանդիպել է ԵՄ-ում այդ երկրի դեսպան Կակաջան Մոմմադովի հետ: Շեֆչովիչը նշել է, որ Կասպյան տարածաշրջանից գազի մատակարարումների գլխավոր բարդությունը Ռուսաստանի դիրքորոշումն է: Մոսկվան պահանջում է, որ մատակարարումներն իրականացվեն միայն ափամերձ պետությունների համաձայնությամբ: Շեֆչովիչը հավաստիացրել է, թե կողմերին կհաջողվի հասնել «տեխնիկական եւ իրավական» համաձայնության:
Գերմանական «Զյուդդոյչե ցայտունգ» թերթը իր հերթին հաղորդում է, որ ԵՄ նոր ռազմավարությամբ ենթադրվում է էներգետիկ քաղաքականության մեջ ԵՄ անդամ երկրներին իրավազրկել հօգուտ Եվրոհանձնաժողովի: Երկրները ԵՄ անդամ չհանդիսացող պետությունների հետ նոր համաձայնագրեր ստորագրելիս ստիպված կլինեն պայմանավորվածությունները փոխանցել Բրյուսելի քննարկմանը, եւ գործարքի վերաբերյալ վերջնական որոշում պետք է ընդունի Եվրոհանձնաժողովը: Վտանգված են «Գազպրոմի» պայմանագրերը, որոնք անցյալում լիովին խորհրդապահական էին: Փաստաթուղթը ենթադրում է «համատեղ գնումների համար ինքնակամ միավորման» ստեղծման հնարավորություն: Գերմանական թերթի տվյալներով, այդ կետը մտցվել է Լեհաստանի, Հունգարիայի, Չեխիայի եւ Սլովակիայի նախաձեռնությամբ, որոնք անհրաժեշտ գազի մինչեւ 90 տոկոսը ներմուծում են Ռուսաստանից:
