Իրաքում եւ Սիրիայում «Իսլամական պետություն» խմբավորման եւ ահաբեկչական այլ կազմակերպությունների շարքերում կռվում են 20 հազար օտարերկրացիներ, այդ թվում առնվազն 3,4 հազար արեւմուտքցիներ: Այդ մասին հաղորդում է Ասոշիեյթեդ պրես գործակալությունըՙ վկայակոչելով ԱՄՆ Կոնգրեսի ստորին պալատի ազգային անտվանգության հանձնախմբի տվյալները:
ԱՄՆ-ի առնվազն 150 քաղաքացի փորձել է Սիրիա մուտք գործել մարտական գործողություններին մասնակցելու նպատակով: Նրանց մի մասը ձերբակալվել է հակամարտության գոտու ճանապարհին, մյուսներն էլ սպանվել են մարտերում: Որոշ ամերիկացիներ էլ մինչեւ օրս կռվում են իսլամիստների հետ կողք-կողքի:
ԱՄՆ ազգային հակաահաբեկչական կենտրոնի ղեկավար Նիկ Ռասմուսսենը նշում է, որ Սիրիայում իսլամիստ գրոհայիններին միացող օտարերկրացիների թիվը զգալիորեն գերազանցում է Աֆղանստանում, Պակիստանում, Եմենում, Սոմալիում եւ Իրաքում իսլամիստներին հարող օտարերկրացիների թվից: Նրա խոսքերով, Իրաքում եւ Սիրիայում մարտերին մասնակցում են առնվազն 90 երկրների քաղաքացիներ:
Վաշինգտոնում վախենում են, որ գրոհայինների մի մասը Եվրոպա կամ ԱՄՆ վերադառնալուց հետո կկազմակերպի ահաբեկչական հարձակումներ: Պաշտոնական անձինք խոստովանում են, որ փաստորեն անհնար է հետեւել իսլամիստների կողմից կռվող բոլոր ամերիկացիներին ու եվրոպացիներին:
