Թուրքիայի նախագահ Ռեջեփ Թայիփ Էրդողանը եւ ԱՄՆ-ի փոխնախագահ Ջո Բայդենը անցյալ շաբաթավերջին Ստամբուլում 4-ժամյա բանակցությունների ժամանակ համաձայնության չեն եկել Սիրիայի ճգնաժամի հարցում, հաղորդում է «Հյուրրիեթ» թերթըՙ վկայակոչելով թուրքական դիվանագիտական աղբյուր:
Վերջինիս տվյալներվ, Թուրքիան հրաժարվում է դառնալ «Իսլամական պետության» դեմ կազմված կոալիցիայի լիարժեք մասը, քանի դեռ ԱՄՆ-ը չի ընդունել «համալիր ռազմավարություն» ոչ միայն ընդդեմ «Իսլամական պետություն» խմբավորման, այլեւ հանուն Սիրիայի նախագահ Բաշար Ասադի պաշտոնանկության: ԱՄՆ-ը հրաժարվում է դա անել, ինչպես նաեւ մերժում է Սիրիայում թռիչքազերծ գոտի ստեղծելու Թուրքիայի առաջարկությունը:
Բայդենը փաստորեն ձեռնունայն վերադարձել է Վաշինգտոնՙ չստանալով Թուրքիայի համաձայնությունը «Ինջիոլիք» ավիաբազան ջիհադիստների դեմ օգտագործելու հարցում: Սակայն Թուրքիան «Իսլամական պետության» դեմ ԱՄՆ-ի եւ կոալիցիայի մյուս անդամների հետ կահամագործակցի «մարտավարական մակարդակով», ճշգրտում է դիվանագիտական աղբյուրը: Սա նշանակում է համագործակցության շարունակում Թուրքիայի տարածքով դեպի Սիրիա օտարերկրացի գրոհայինների անցմանը հակազդելու, հետախուզական տեղեկություններ փոխանակելու եւ սահմանի անվտանգությունն ապահովելու հարցերում: Թուրքիան պարտավորվել է իրաքյան բանակի եւ Իրաքյան Քրդստանի ռազմականացված կազմավորումների մարտիկներին մարզել «Իսլամական պետության» դեմ պայքարելու համար:
