Ճապոնիայում հանրությանը ներկայացվել են Pepper «մարդանման» ռոբոտներ, որոնք կարողանում են շփվել մարդու հետ եւ նույնիսկ, ըստ հեղինակների, «հույզեր զգալ»: Պատրաստվել է 200 փորձանմուշ: Pepper-ը վաճառքի կհանվի 2015 թ. սկզբներին, հաղորդում է Japan Times թերթը:
Pepper-ը ցուցահանդեսի այցելուների հետ զրուցել է սիրո եւ մարդկային հարաբերությունների բարդ թեմաների շուրջը:
Նորագույն ռոբոտը հանդերձավորված է բազմաթիվ տվիչներով, որոնք նրան թույլ են տալիս զգալ, թե զրուցակիցներն ինչպես են արձագանքում իր այս կամ այն խոսքին: Pepper-ի գլխում տեղադրված են եռաչափ լազերային տվիչ եւ երկու գունավոր տեսախցիկ: Ռոբոտի հիանալիորեն մշակված ձեռքերն ունեն տվիչներ, որոնք զգայուն են հպումների նկատմամբ:
Ռոբոտի կրծքի վրայի 10 դյումանոց զգայուն էկրանը միացված է NAOqi05 օպերացիոն համակարգով գործող համակարգչին: Համակարգը «մարդանման» ռոբոտին հնարավորություն է տալիս օգտագործել հույզերի ճանաչման ծրագիր: Գիտնականները մտադիր են եկող տարի Pepper-ը հանդերձավորել ինքնակրթության գործառույթով, ինչը նրան թույլ կտա մարդկանց հետ շփվելու փորձ կուտակել եւ չկրկնել անցյալի սխալները:
Ռոբոտի հասակը 1,2 մետր է, քաշըՙ 28 կիլոգրամ: Սպասվում է, որ էլեկտրոնային զրուցակիցը կարժենա 1930 դոլար:
