Արտակարգ իրավիճակների նախարար Արմեն Երիցյանը երեկ կառավարության նիստում հայտարարեց, որ հոկտեմբերի 26-ից Հայաստան կներթափանցեն սիբիրյան ցիկլոնները եւ հոկտեմբերի 27-ից ջերմաստիճանը կտրուկ կնվազի: Մասնավորապես, 20 աստիճանով օդի ջերմաստիճանը կնվազի Լոռու, Տավուշի, Սյունիքի մարզերում եւ Լեռնային Ղարաբաղում, իսկ Երեւանում եւ մյուս մարզերումՙ 10 աստիճանով:
Արտակարգ իրավիճակների նախարարության տեղեկատվության համաձայն, հոկտեմբերի 26-28-ին, պայմանավորված հյուսիս-արեւելքից արկտիկական ցուրտ օդային զանգվածների ներխուժմամբ, սպասվում է եղանակային պայմանների կտրուկ փոփոխություն: Ամենուրեք սպասվում են տեղումներ, առավելագույն ինտենսիվությունը կդիտվի հոկտեմբերի 27-ին: Լեռնային շրջաններում, Լոռիում, Տավուշում, Սյունիքում եւ Արցախում տեղումները կդիտվեն ձյան տեսքով, մյուս շրջաններում` անձրեւի: Նշված օրերին օդի ջերմաստիճանը Լոռիում, Տավուշում, Սյունիքում եւ Արցախում կնվազի 17-18 աստիճանով, մնացած մարզերում` 7-9 աստիճանով:
Երեւանում հոկտեմբերի 26-ի ցերեկային ժամերին կանխատեսվում է, որ ջերմաստիճանը կլինի 11-13 աստիճան, իսկ հոկտեմբերի 27-ին` 10-12 աստիճան տաքություն, ժամանակ առ ժամանակ սպասվում է անձրեւ:
