Այս տարվա` 2014-ի հունվար-օգոստոսին ՀՀ բանկային համակարգի միջոցով դեպի Հայաստան կատարված ոչ առեւտրային նպատակով դրամական փոխանցումները կազմել են 1 մլրդ 153 մլն 337 հազար դոլար: Հայաստանից դեպի արտերկիր դարձյալ ոչ առեւտրային նպատակով կատարվել են 226 մլն 382 հազար դոլարի դրամական փոխանցումներ: Արդյունքում ոչ առեւտրային նպատակով գումարների զուտ ներհոսքը Հայաստան կազմել է 926 մլն 955 մլն դոլար: Այս մասին տեղեկանում ենք ՀՀ ԿԲ տեղեկագրից:
Համեմատության համար նշենք, որ անցյալ տարվա` 2013-ի հունվար-օգոստոսին Հայաստան էր փոխանցվել 1 մլրդ 139 մլն 345 մլն դոլար, Հայաստանից դեպի արտերկիր` 202 մլն 996 հազար դոլար եւ զուտ ներհոսքը դեպի մեր երկիր կազմել էր 936 մլն 349 հազար դոլար:
Այսինքն, այս տարվա առաջին 8 ամիսներին դեպի Հայաստան դրամական փոխանցումներն ավելացել են, բայց գումարների զուտ ներհոսքը դեպի Հայաստան փոքր-ինչ` մոտ 10 մլն դոլարով կամ 1 տոկոսով նվազել է: Դա պայմանավորված է երկու գործոնով` Հայաստանից դեպի արտերկիր դրամական փոխանցումների աճն ավելի մեծ է եղել, քան ներհոսքը, դրամական փոխանցումներ ուղարկող հիմնական երկրից` Ռուսաստանից դեպի Հայաստան փոխանցումները նվազել են:
Որքա՞ն են նվազել փոխանցումները Ռուսաստանից
Ռուսաստանի Դաշնությունից նույն ժամանակահատվածում Հայաստան է փոխանցվել 958 մլն 159 հազար դոլար, Հայաստանից դեպի Ռուսաստան` 128 մլն 423 հազար դոլար, գումարային զուտ ներհոսքը Ռուսաստանից Հայաստան` 829 մլն 736 հազար դոլար: Նշենք, որ նախորդ տարվա նույն ժամանակահատվածում դեպի Հայաստան Ռուսաստանից փոխանցվել էր 972 մլն դոլար, Հայաստանից դեպի Ռուսաստան` 114 մլն դոլար, փոխանցումների զուտ ներհոսքը Ռուսաստանից կազմել էր 858 մլն դոլար:
Փաստորեն, դրամական փոխանցումների առյուծի բաժինը շարունակում է գալ Ռուսաստանից` 926 մլն 955 մլն դոլար ոչ առեւտրային նպատակով դրամական փոխանցումների դեպի Հայաստան զուտ ներհոսքից 829 մլն 736 հազար դոլար բաժին է ընկնում Ռուսաստանին: Միաժամանակ, նվազել են այդ երկրից դեպի Հայաստան փոխանցումների թե՛ ընդհանուր ծավալը, թե՛ զուտ ներհոսքը , ինչը պայմանավորված է Ռուսաստանի տնտեսական վիճակի վատթարացմամբ, որի հիմնական պատճառը Արեւմուտքի արգելքներն են այդ երկրի նկատմամբ եւ նավթի գների շարունակվող անկումը, ինչը նույնպես, շատ մեկնաբանների կարծիքով, ԱՄՆ կողմից արվում է Ռուսաստանի բյուջետային մուտքերին հարվածելու համար:
Ռուսաստանին հաջորդում են ԱՄՆ-ն եւ Ղազախստանը
Երկրորդ երկիրը, որտեղ ապրող հարազատներից դրամական փոխանցումներ են ստանում հայաստանցիները, ԱՄՆ-ն է: Այդ երկրից այս տարվա 8 ամիսներին դեպի Հայաստան է փոխանցվել 64 մլն 650 հազար դոլար, Հայաստանից դեպի ԱՄՆ` 22 մլն 983 հազար դոլար, գումարային զուտ ներհոսքը ԱՄՆ-ից Հայաստան կազմել է 41 մլն 666 հազար դոլար:
Երրորդը Ղազախստանն է: Այդ երկրից Հայաստան է փոխանցվել 18 մլն 401 հազար դոլար, Հայաստանից դեպի Ղազախստան` 2 մլն 288 հազար դոլար, գումարային զուտ ներհոսքը Ղազախստանից Հայաստան կազմել է 16 մլն 112 հազար դոլար:
Մտադրություն 1800 աշխատատեղ ապահովող պոչամբարների վերամշակման ձեռնարկություն ստեղծելու մասին
Կառավարությունը երեկ հավանություն տվեց «Մտադրությունների մասին» հուշագրի նախագծին, որով ՀՀ կառավարությունը, «Քրոնիմետ Մայնինգ» բաժնետիրական ընկերությունը, «Զանգեզուրի պղնձամոլիբդենային կոմբինատ» ՓԲԸ-ն, VSEI ձեռնարկությունների խումբը եւ «Ալյոտիգ» ՍՊԸ-ն օգտակար հանածոների արդյունահանման ընթացքում առաջացած լցակույտերի (պոչամբարներ) ապարների վերամշակման ձեռնարկություն պետք է ստեղծեն: Նախնական հաշվարկներով, ներդրումները կարող են կազմել շուրջ 200 միլիոն դոլար, կստեղծվի շուրջ 1800 աշխատատեղ: Ինչպես նշեց հարցը ներկայացնող էներեգտիկայի եւ բնական պաշարների փոխնախարար Լեւոն Շահվերդյանը, գործարանի կառուցման բիզնես պլանը կներկայացվի առաջիկա 2 ամսվա ընթացքում: Ակնկալվում է, որ այս նախագծի իրագործումը բացի տնտեսական արդյունավետությունից, լուրջ բնապահպանական խնդիրներ կլուծի, քանի որ նախատեսում է վերամշակել հանքային լցակույտերի 98 տոկոսը:
