ԱՐԱ ԱԲՐԱՀԱՄՅԱՆ, Համաշխարհային հայկական կոնգրեսի եւ Ռուսաստանի հայերի միության նախագահ, ՄԱԿ-ի ՅՈՒՆԵՍԿՕ-ի բարի կամքի դեսպան, Երեւան, 26.09.2014թ
Սույն թվականի սեպտեմբերի 21-ինՙ Հայաստանի Հանրապետության անկախության տարեդարձի օրը, Սիրիայի Դեյր էլ Զոր բնակավայրում իրենց «Իսլամական պետություն» հռչակած զինյալների կողմից իրականացվել է բարբարոսության ու վանդալիզմի աննախադեպ ակտՙ պայթեցվել է հայկական Սրբոց Նահատակաց եկեղեցին:
Համաշխարհային հայկական կոնգրեսը եւ Ռուսաստանի հայերի միությունը խստորեն դատապարտում են ազգային ողբերգության խորհրդանիշ հանդիսացող հոգեւոր այդ կառույցի հանդեպ գործած ոճիրը: Ցասումով ու վրդովմունքով ենք լցված պատմամշակութային անկրկնելի հուշարձանի միտումնավոր ոչնչացման փորձի առնչությամբ:
Հայտարարում ենք, որ դա անլուր եւ լկտի անարգանք է Հայոց ցեղասպանության 100-րդ տարելիցին ընդառաջՙ հայ ժողովրդի պատմական հիշողության, մեր սուրբ ու նվիրական զգացմունքների եւ մեր նահատակների հիշատակի նկատմամբ: Սիրիական պատերազմի ավերածություններից, Հալեպում հայկական թաղամասերի դեմ պարբերաբար կազմակերպվող գրոհներից, ամիսներ առաջ Քեսաբի վրա թուրքական իշխանությունների աջակցությամբ ծայրահեղականների իրականացրած հարձակումից հետո, սա եւս մեկ փորձություն է տարածաշրջանի խաղաղ բնակչության եւ հատկապես քրիստոնյա համայնքների համար:
Մենք կոչ ենք անում Համաշխարհային հայկական կոնգրեսի կառույցներին, աշխարհասփյուռ հայությանը համախմբվել եւ բողոքի ձայն բարձրացնել ի պաշտպանություն սփյուռքում ազգային հոգեւոր եւ մշակութային մեր արժեքների:
Արդարության հաստատման ուղերձով մենք դիմում ենք աշխարհի քրիստոնյա հանրությանը, միջազգային ու տարածաշրջանային հեղինակավոր կազմակերպություններին, քաղաքակիրթ պետությունների ժողովուրդներին ու կառավարություններինՙ կոչ անելով խստորեն դատապարտել հոգեւոր արժեք ներկայացնող կառույցի հանդեպ իրագործած այդ ոճիրը, գործուն միջոցներ ձեռնարկել հանցավոր այդ կազմակերպության դեմ, առավել համակարգված հանդես գալ թիվ մեկ վտանգիՙ համաշխարհային ահաբեկչության դեմ պայքարում:
