Լուգանսկի Ժողովրդական Հանրապետության (ԼԺՀ) ղեկավար Իգոր Պլոտնիցկին հայտարարել է, որ Դոնեցկի Ժողովրդական Հանրապետության (ԴԺՀ) եւ ԼԺՀ իշխանությունները Կիեւի հետ կքննարկեն երկու ինքնահռչակ հանրապետությունների պետական կարգավիճակի հարցը:
«Ուզում եմ ընդգծել, որ Մինսկում կայացած խորհրդակցությունների ժամանակ ԼԺՀ-ի եւ ԴԺՀ-ի պետական կարգավիճակը առանձին չի քննարկվել: Այն կարող է թեմա դառնալ մոտ ժամանակներս շարունակվելիք բանակցությունների հաջորդ փուլերում», հայտարարել է նա ԻՏԱՌ-ՏԱՍՍ-ի թղթակցին:
Պլոտնիցկին նշել է, որ ո՛չ ԼԺՀ-ն, ո՛չ էլ ԴԺՀ-ն մտադիր չեն հրաժարվել սեփական անկախությունից:
«Ժամանակավոր հրադադարը չի կարող ի չիք դարձնել ժողովրդի կամարտահայտման արդյունքները: Դոնբասի բնակիչները միանշանակ կերպով արտահայտվել են մեր հանրապետությունների անկախության օգտին: Եվ այլեւս չի կարող լինել որեւէ վերադարձ նախկին կարգավիճակին», ընդգծել է նա:
Ավելի վաղՙ սեպտեմբերի 10-ի առավոտյան, Ուկրաինայի նախագահ Պետրո Պորոշենկոն հայտարարել էր, որ Դոնեցկի եւ Լուգանսկի մարզերի հատուկ կարգավիճակի հարցը խորհրդարան կմտցվի եկող շաբաթ, եւ որ այդ մարզերը կմնան Ուկրաինայի կազմում: Ֆրանսիական «Մոնդ» թերթը մեջբերում է Պորոշենկոյի խոսքը. «Չի կարող տեղի ունենալ քննարկում դաշնայնացման կամ անջատման վերաբերյալ: Ժամանակավոր ինքնավարության օրենքը Դոնեցկի եւ Լուգանսկի մարզերին տալիս է մի կարգավիճակ, որն այդ շրջանները պահում է Ուկրաինայի կազմում»:
Սակայն ռուսամետ անջատականները պահանջում են իրենց տարածքի անկախություն, շարունակում է «Մոնդը»: «Մենք չենք կարող մնալ Ուկրաինայի մասը», հայտարարել է ԴԺՀ փոխվարչապետ Անդրեյ Պուրգինը :
